Pinehas

Rav Yeuda ADONİ Köşe Yazısı
9 Temmuz 2014 Çarşamba

Ansi avlo el Kriyador a Moshe:

Pinehas ijo de Elazar, ijo de Aaron Akoen, izo tornar mi sanya, de los ijos de Israel zelando mi zelo entre eyos. I no konsumi a los ijos de İsrael en mi zelo. Por tanto di mi firmamyento de paz. I tendra el, i su semen despues de el firmamyento de keuna para syempre.

Ansi enpesa la perasha de Pinehas. El puevlo cudyo aserkandose a el Yarden pozaron en un luguar nombrado Sitim. Los moavim vyendo ke los ijos de Israel no pensaron de gerear kon eyos, se aserkaron a los cudyos. Sovre el konsejo de Bilam ke les dyo a saver,ke lo ke se puede venser a este puevlo cudyo, es kuando reveyan i pasan el komando de el Kriyador. Izyeron todo su posivle por azer trazyerar a los cudyos i ke kovdisyaron en sus ijas i sus mujeres de los moavim. Malorozamente el puevlo cudyo se desho venser de su negro apetite, i se trazyerraron en este partikular. I no mankaron ke sirvyeron i adoraron tambien a sus idolos. El Kriyador mando una mortaldad entre el puevlo i muryeron vente i kuatro mil personas. En el tyempo ke estava el puevlo atristad tuvo la ozadiya un syerto Zimri del Trivo de Shimon, i tomo una ija de un grande personaje de Midyan. I se la yevo kon un deskaramyento, delantre de Moshe i todo Israel. En la ora ke toda estavan yorando, ninguno no tuvyeron. el koraje de azer nada a este akto. Un syerto personaje nombrado Pinehas ijo de Elazar ijo de Aaron Akoen zelo sovre esta desgrasya i mato kon una lansa, i mato a Zimri i a Kozbi bat Tsur. Grasyas a Pinehas ke al punto kedo la mortaldad. I el Kriyador ke dyo su renkonpensa a Pinehas, i los desho bivir munchos anyos. I le dyo la Keuna Gedola a su semen.