Felipe Carlos, Juan Carlos i los Judios Sefaradis

Felipe Carlos, Juan Carlos i los Judios Sefaradis

En los diyas ke pasimos, Felipe Carlos se proklamo  el muevo rey de Espanya. El puevlo tiene la esperansa ke esta tranzision va ser el empesijo de una mueva era de stabilidad por la monarkiya.

En una kurta seremoniya, Felipe tomo la mision de su padre, Juan Carlos, i se deklaro el muevo rey de Espanya.

Vistido en una uniforma militar, Felipe djuro fidelidad a la Konstitusion de Espanya. Jesus Posada, Prezidente del Parlamento, lo proklamo rey, en deklarando: ‘Viva el Rey! Viva Espanya!’

El muevo rey ekspreso su solidaridad kon el puevlo de Espanya, ke estan gerreyando kon una kriza ekonomika. Agora ke paso al trono, Felipe va tomar el nombre Felipe IV.

Felipe Carlos es el solo ijo de Juan Carlos. Kuando teniya 18 anyos, Felipe djuro fidelidad a la Konstitusion, al rey en el Parlamento espanyol, i aksepto su rolo komo suksesor del trono.

Felipe Carlos estudio Derecho (Hukuk) en la Universidad de Madrid, i izo sus estudios de Master enriva de Relasiones Enternasionales en la Universidad de Georgetown en los Estados Unidos. El muevo rey tiene 46 anyos, es kazado kon Letizia Ortiz, i tiene dos ijas.

Felipe es muy aktivo en munchas areas. Mezmo antes de pasar al trono, se estuvo okupando de aferes politikos i ekonomikos. Munchas vezes, izo viajes ofisiales a los paizes evropeanos, a la Amerika Latina, al Oriente Medio, i a Australia. El muevo rey fue muy aktivo en la promosion de los enteresos ekonomikos, i komersiales de Espanya.

Juan Carlos desho el trono a su ijo duspues de una reynada de trenta i mueve anyos. En los anyos dalkavo del reynado de Juan Carlos, Espanya entro a una kriza ekonomika. Duspues de la kriza ekonomika, la konfiensia a la monarkiya espanyola aminguo de diya en diya. El rey desho el trono a su ijo kon muncha difikuldad. El partido komunisto de Espanya estava kontra ke Felipe pase al trono. Esta tranzision no va pasar kon muncha trankilidad. El muevo rey tiene de gerreyar kon munchos problemas.

Por los judios sefaradis, Juan Carlos fue el mijor rey de Espanya. Duspues de la seremoniya en la Sinagoga prensipal de Madrid, a la kuala Juan Carlos asisto, miles de judios emigraron de la Amerika Latina a Espanya. Oy, 45.000 judios estan biviendo en Espanya.

Por los judios sefaradis, Juan Carlos fue el sembol de los esfuersos del pais, para demandar pardon por los pekados del pasado kontra los judios. Segun Carlos, los desendientes de los judios sefaradis del pasado, deven de kontinuar a ser una parte de Espanya.

Juan Carlos propozo la ley de situayena a los sefaradis. Los ministros del partido derecho dieron suporto a esta ley desde el anyo 2012. Esperamos ke esta ley va ser akseptada por el Parlamento de Espanya, i ke los dezakuerdos entre los partidos politikos no vana enfluensar esta ley. Los judios Sefaradis en el mundo entero estan asperando kon grande atansion ke esta ley seyga akseptada en el Parlamento.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın