Komo se kreo el dia de las madre

Dora NİYEGO Judeo-Espanyol
14 Mayıs 2014 Çarşamba

El Alhad ke pasimos, selebrimos el Dia de las Madres. En este dia, tuvimos la okazion de ekspresar muestra amor i gratitud a muestras madres. Muestras madres no solo mos engrandesieron, ma siempre estuvieron a muestro lado en los momentos difisiles. La madre es la sola persona ke da su kerensia a sus ijos, i aze todo modo de sakrifisio por sus ijos sin dinguna kondision.

El sentimento maternal es una parte enseparavle de todas las mujeres. En el judaizmo, el primer dover de la mujer es de mentener la vida i la salud de sus ijos. Ma, la madre no lo aze porke es su dover; esto le viene de ariento, i no puede azer el kontrario, mezmo si se forsa.

El Dia de las Madres se selebro por la primera vez en el anyo 1908, kuando Anna Jarvis komemoro el memorial de su madre en Virjinia. Jarvis peryo su kerida madre en el anyo 1905, i penso ke es su mision de onorar su madre. La madre de Anna era una aktivista de pas ke se okupo de los soldados eridos en la gerra sivil. Eya aviya kreado un klub de madres. Anna penso ke kale ke eskape el echo ke su madre aviya empesado. Jarvis fikso un dia en el anyo para onorar las madres, ‘las personas ke no abatsa biervos para deskrivirlas’.

Kon los esfuersos de Anna, en el anyo 1914, Woodrow Wilson afirmo la proklamasion de krear un dia por las madres. El segundo Alhad del mez Mayo se fikso komo ‘una fiesta nasional para onorar las madres’. Para remersiar Woodrow Wilson, Jarvis le eskrivio una letra diziendo: ‘Este es un grande dia por muesro pais. En este dia, ijos i ijas vana onorar sus madres, sus padres i sus kazas, i ansi se vana atar mas muncho a sus famiyas’.

Mezmo ke Anna Jarvis reusho a fondar un dia por las madres, eya empeso a inyervarse ke este dia se izo un dia de komerso. Los komersantes empesaron a profitar de esta okazion. Emprimero kitaron Kartas del Dia de Madres, i mas duspues vino otros regalos sembolikos por este dia.

Jarvis protesto esta komersializasion, i empeso a organizar boykotes. Eya entro mezmo al prezo por sus aktividades.

Ma, malgrado estos feyos eventos, un sierto tiempo duspues, munchos otros paizes konosieron ofisialmente el Dia de las Madres. Oy, este dia se selebra en el mundo entero. En esta tradison, kada persona ofre un regalo u un rekuerdo a su madre. La entision orijinal es de apresiar, i onorar las madres en eskriviendo una karta para ekspresar la amor i la gratitud a las madres.