Memoria de Pesah de una sorviven

Dora NİYEGO Judeo-Espanyol
9 Nisan 2014 Çarşamba

Noche de Pesah, la famiya entera kon los inyetos asentados en la meza de Seder, me izo akodrar el Pesah del anyo 1941. Era manseva akeyos anyos, eskondida en un kanton obskuro en el sentro de Fransia.

Oy, la fiesta de Pesah ke estomos selebrando kon todo el konfor, el lukso, las komidas savrozas, no se puede komparar en mi korason kon el Pesah de sesentidos anyos antes. 1941 fue el Pesah el mas ekstraordinaryo de mi vida. Antes de kontarvos akel Pesah, kero eksplikarvos komo entri a este kanton obskuro.

Estavamos biviendo muy kontentes kon mi famiya en Nurenberg. En el anyo 1933, la vida por los judios se estava aziendo de diya en diya mas difisil, finke, un diya, trupos de Nazis entraron a Nurenberg, ordonando a todos de meter la bandiera de los Nazis en los edifisios emportantes.

En el anyo 1936, mi padre mos yevo a Paris porke lo aviyan enkargado komo rabino en la Sinagoga de la Rue Cadet. Unos kuantos anyos duspues, la situasion troko, i mi padre fue ovligado a deshar su posto. En el anyo 1940, kuando los Nazis empesaron a bombardear Paris, mi madre tomo a los kuatro ijos, i mos suvimos al treno, antes ke venga la atak grande. Era un diya antes la fiesta de Shavuot.

Unos kuantos mezes mas duspues, por entero peryi la trasa de mi famiya, i empesi a arastarme de vilajio en vilajio. Una noche, antes el amaneser, me konsinti ke no iva pueder ir mas leshos. Soni la puerta de un vilajiero, el vilajiero me tomo ariento. Abashimos endjuntos debasho la tierra. Aya aviya una otra ijika komami. Unos kuantos diyas duspues, vinyeron dos otros ijikos, i una otra ijika. En los primeros diyas, dingunos no teniyamos el koraje de dizir ke somos judios.

Akel anyo, uvo un invierno terivle. Kada demanyana, muy poka luz entrava de las ventanas altas de la pared. Esta luz era la sola koza ke viyamos del mundo de afuera. El vilajiero, kada demanyana, abashava de estas ventanas sinko bokados de komida, i un chukal para muestros menesteres. Komparando a las otras kreaturas, se puede dizir ke eramos muy mazalos. En akel invierno difisil, sinko kreaturas, leshos de sus kazas, mos atimos unos kon los otros kon valores muy diferentes de las de oy, i kon una amistad grande ke kontinuo la vida entera.

Un diya, mirando de la ventana, uno de entre mozotros apersivio el sol briyando en el sielo. Unos kuantos diyas duspues, vimos erbas kresiendo en la tierra. No teniyamos kalenderio.

El sol briyando i las erbas vedres, eran el solo mesajero de la primavera. Dishimos ke, puede ser ke eran los diyas de Pesah. Kada uno de mozotros eramos de diferentes klasas del judaizmo. Ma, todos los sesh teniamos el mezmo dezeyo, ‘azer lo ke se deve para selebrar la fiesta de Pesah’.

El diya suivante, kuando el vilajiero mos trusho la komida, le demandimos si mos puediya trayer un poko de arina, una ridoma de agua, una gazeta, i una koza para alumar. Mos trusho la arina unos kuantos diyas duspues, porke todo estava vinyendo de la Almania del Notre. Mezmo el vilajiero no teniya nada de komer.

Duspues ke arivo la arina, mos desidimos de asperar unos kuantos diyas mas, para asigurarmos ke estavamos en la primavera. Un diya ke el sol estava briyando en el sielo, mos desidimos de selebrar la fiesta de Pesah. Dishimos, si trokamos las vistimientas unos kon los otros, iva ser komo si mos aviyamos merkado vistimientas muevas. Antes ke se aga de noche, deviyamos de aparejar la matza.

Echimos la agua enriva la arina, kemimos la gazeta, i kon las dos manos detenimos la arina mojada enriva la flama para ke se toste. Esto iva ser muestra matza.

Akeya noche, selebrimos la fiesta. Uno de entre mozotros saviya el Kiddush. Un otro demando las kuatro kestiones, ke es la parte del Seder ke los ijikos chikos resitan. Kontimos estorias del Exodus, ke mos akodrimos de muestros padres, i a la fin del Seder, kantimos las kantikas de Pesah, ke eskapan la noche.

Nunka no mos puedemos olvidar de akel Pesah, sin komidas de Pesah, sin vino, i sin chinis luksozos. Muestro solo dezeyo era de komunikar kon el Dio. Akeya fiesta fue la mas profonda de todas las fiestas ke pasimos fin oy.

Esto remersiando al Dio, ke me diyo la vida, i ke oy esto puediendo kontar esto todo ke pasimos a mis ijos, i a mis inyetos. La prezensya del Dio en mi vida, sus mirakolos me izo savlar la vida, komo salvo fin oy el puevlo judio de todos los dezastros.