Si alguna persona se remarkava sovre su kuerpo algunas yagas ke las nomba en la perasha de Tazria ‘Tsaraat’. Lepra, despues ke los egzaminava el Koen, lo apartava syete diyas de la djente. Lo aziya morar el Koen, un sierto tyempo solo. Dita persona, en estando solo se aziyo un egzamen de konsensya i bushkava por ke pekado kavzo estas yagas en su kuerpo? Sigun nuestros savyos estas yagas yagavan el kuerpo de el ombre, por kavza de no puederse detener su boka de avlar mal i kozas ke no konsernan a el.
Siguramente, kuando la persona entendiya su yerro, aziya teshuva; kere dizir, se arepintiya de su yerro i tornava a el kamino derecho.
El eskopo de el Kriyador de traer a el ombre estas yagas era: de kreyar en la persona un buen karakter. Kreyar a el ombre de nueva. Limpyo i bueno.
Por la persona ke fue yagado es dicho: No puede tokar la santedad, i no puede vinir a el santuvaryo asta ke va kimplir los diyas de su limpyeza. De aki nos enbezamos, la persona deve de saver si no se alimpyo de sus enkoniyos no deve de vinir a la santedad a dito persona ke fue yagado, lo traian a el Koen. La misyon de el Koen era, de bendizir a el puevlo kon amistad. El presigiya la pas i muchiguava la pas i la buendad.
Kon sus buenos konsejos, kon sus dulses palavras lo tornava a el ombre a un buen kamino. En dita perasha meldamos, si sovre la yaga se topava un kaveyo blanko, el Koen lo apartava por ke era enkonado. Este verseto de la perasha, no kere endikar,
El ombre malgrado su edad avansada, ke sus kaveyos ya se le enblankesyeron, si no esta en un buen kamino, es ke no esta korekto verso el Kriyador, verso su famiya i verso la djente. No kere dicho, ke estamos enkomendados de parte de muestros savyos, el ombre deve de tornar a el buen kamino. Ainda kuando esta en sus fuersos.
Shelomo Ameleh en livro Mişle dize: La vida i la muerte de el ombre esta dekolgada en la alguenga. El ombre si enpleya sus avlas para bueno alarga sus vidas si es a la kontra malorozamente danya sus vidas, tambien donya su salud. El biervo Tsaraat-Metsora, ke sinyefika la Lepra lo entermeten los savyos. Motsi Ra kitar koza feya de la boka. Kitar fama mala por su serkano.
Dizen nuestros savyos: Una persona puede danyar a su enimigo kon la espada si esta serka de el ma kon la alguenga lo danya malgrado ke se topa muy leshos de el. Avlar mal kere dizir lashon ora, entra en un grupo de pekados muy fuertes komo, sirvir idoloz. Avada zara, i verter sangre. Miryam la ermana de Moşe Rabenu se apeno kon yagas de lepra por ke avlo por Moşe Rabenu.
Komo sufre el kuerpo de el ombre, kon diferentes hazinuras i la alma de el ombre sufre de hazinuras. David Ameleh en una de los salmos de teilim dize: “Refaa nafşi ki hatati lah”. Melizina mi alma por ke peki kontra ti.
Los dezrepozos, las angustyas ke vyenen sovre el ombre deve de azerlo pensar, i tornarlo a un buen kamino.
Si puedemos entender el buen doktrino de la Tora i de nuestros savyos, estonses vamos a ser bien aventurados, i vamos a tener mancho bueno. Si tenemos buena entisyon, El Kriyador syempre no ayuda. I nos ayudara syempre Amen.
