El problem del ‘get’ En la ley judiya

El problem del ‘get’  En la ley judiya

En la sosiedad judiya, ay miles de mujeres ke no estan puediendo divorsar porke los maridos no keren darles el ‘get’ (el dokumento relijiozo ke permete el divorso). En munchos de estos kavzos, la mujer no se esta puediendo kazar, i meter su vida en kamino.

En el judaizmo, para ke un divorso se realize, el ombre kale ke de el ‘get’ a la mujer. Malorozamente, ay ombres ke estan refuzando de dar el ‘get’. Esto es una forma de esklavaje, i de abuzo emosional, porke el ombre esta forsando la mujer a la soledad. Estas mujeres no estan puediendo kazarsen, o tener una relasion kon un otro ombre asta ke el divorso se realize.

En la ley judiya, la mujer tiene el dirito de akseptar, o refuzar el ‘get’. Ma, oy en İsrael, ay solo uno o dos ombres ke se estan sintiendo esklavos porke la mujer no esta akseptando el ‘get’. En komparezon, segun el rabino Eliahu Maimon (el shef de Agunot de los Tribunales Judyos), solo en İsrael, ay mas de sien mujeres ke estan sufriendo de este problem.

‘En la ley judiya, el kazamiento es una realidad espiritual entre un ombre, una mujer i el Dio. Ansi, kuando este kazamiento se va dezazer, tiene menester del akordo de las dos partes’, esta eksplikando Rabino Maimon.

En el pasado, una aguna era una mujer ke el marido se fue a la gerra, i no torno mas atras. No se saviya, si el ombre estava bivo u muerto, i por modo de esto, la mujer no se puediya kazar.

Oy, estos kavzos son pokos. Si un ombre no kere salir delantre del Tribunal Judyo por divorsar, la mujer se konsidera komo ‘una aguna’. Oy, en İsrael, si el tribunal desida ke el ombre deve de dar el ‘get’, i si el ombre no aksepta, el tribunal puede meter restriksiones al ombre. Le toman de la mano el permito de konduizar, sus kartas de kredito, serran su kuento de banka, i lo ovligan a pagar una grande kantidad de moneda. En kavzos ekstremos, el Tribunal puede desidar mezmo de meterlo al prezo.

Munchas vezes, estas restriksiones estan sufizantes para konvenser el ombre a divorsar. Ma, ay munchos ombres ke estan en las priziones, i ke dainda estan refuzando de dar el ‘get’.

Rabino Maimon esta penando para kitar dos muevas leyes ke va ayudar a solvar este problem.

La primera ley va dar mas muncho poder a los tribunales judyos para meter otras restriksiones a los ombres ke estan en la prizion. Estos ombres no vana pueder avlar kon telefon, i sus parientes o amigos no vana pueder vinir a vijitarlos.

La segunda ley va deklarar ke estos ombres vana ser konsiderados komo asasinos, i ansi no vana pueder fuirsen del pais.

Las organizasiones de mujeres, kada anyo, tienen un Diya Enternasional de Agunot. Este anyo, este diya kayo al tredje de Marso. Akel diya izieron munchas aktividades, i estan organizando otras aktividades para proklamar este problem al mundo entero. Uvo una reunion en el Knesset para diskutar este problem. Algunas de estas aktividades son: un festival de sinema, una kampanya en Facebook, i un rali en el sentro de Yerushalaim. En el rali, las mujeres se metieron maskas blankas en la kara, para amostrar ke no tienen poder enriva de sus vidas.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın