La Tora torno atras a trankoso

La Tora torno atras a trankoso

El jurnalisto Michael Freund eskrivio en un artikolo sovre la seremoniya de la Sefer Tora ke fue dedikada a la Sinagoga Beit Mayim Hayim, en Trankoso ke es una sivdad vieja en Portugal.

Situada en el distrikto de Guarda, en el nordeste de Portugal, la vieja sivdad Trankoso, un tiempo fue el ogar del puevle judyo ke fueron forsados a konvertirsen en el anyo 1497.

Serka de la entrada de la Sinagoga, en una pared komemorativa, estan eskritos los nombres de los B’nai Anusim (marranos), ke fueron djuzgdos por la Engizision por pratikar el judaizmo en sekreto. Munchos de eyos fueron kemados enfrente de la djente en el diziochen siglo.

El jurnalisto i historidor, Jose Levy Domingos, ke lavoro por anyos a prezervar la erensia judiya en esta sivdad, deskruvio en este viejo distrikto judyo de Trankoso, enskripsiones de piedra i otras trasas de esta epoka pasada.

En las kazas judiyas, por egzamplo, las ventanas eran echas de una manera asimetrika, kon diferente alturas i grandezas, amostrando una architektura imperfekta. 

Jose Levy Domingos ekspliko ke los judyos empleyaron esta architektura imperfekta kon la entision de amostrar ke solo el Templo situado en Yerushalaim es perfekto.

Munchas de estas kazas medivalas tienen kruzas gravadas en la entrada komo una deklarasion ke son kristianos. Kon el espanto de ser deskuvridos, los maranos de Trankoso tambien partisiparon a la pratika kristiana, aunke kon amargura en el korason.

Debasho de la kruza gravada en la entrada, ay tres dientes ke estan detenyendo la kruza. Al ojo judyo, es klaro ke estos dientes estan formando la letra ebrea Shin, ke se utiliza para referar al uno de los nombres divinos.

Ansina fue komo los judyos sekretos de Trankoso miraron a guadrar sus erensia judiya, amostrando ke no se olvidaron, ni abandaron la kreensia de sus antepasados.

Dingunos no pueden amatar la flama judiya. Somos una nasion immortal.

El rulo de la Tora fue dedikada a la Sinagoga para inogurar el muevo sentro kultural i relijiozo de este distrikto. Esta Sefer Tora va servir a los maranos ke biven en esta rejion del pais.

A este sentro judiyo ke se yama İsaac Cardoso Center, se dio el nombre de un mediko i filozof de orijin Trankoso. İsaac Cardoso era de una famiya de maranos ke fuyeron a Venisia para fuyir de la engizision, ande el i su ermano tornaron al judaizmo  Cardoso publiko munchos livros, uno de estos siendo ‘The Excellence of the Hebrews’, ande defendio el judaizmo i los judyos de los aktos antisemitikos.

En este sentro, se topa tambien una egzebision sovre la istoria judiya de Portugal i la renovasion de la vida judiya en la rejion en los anyos ke pasimos.

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın