Los prensipales eventos konsernando los judyos en el anyo 2013

Dora NİYEGO Judeo-Espanyol
25 Aralık 2013 Çarşamba

Segun un artikolo ke meldi, la ADL izo una lista de los prensipales eventos ke enfluensaron los judyos en el anyo 2013: las negosiasiones nukleares entre los Estados Unidos i İran, la vijita de Obama a İsrael i su propozision por una solusion de dos estados, el progreso por el kazamiento de los omoseksuales en los Estados Unidos, el asento de la ekstrema derecha en la Evropa i la pujita del antisemitizmo en el mundo entero, la eleksion del Kardinal Jorge Bergoglio komo administrator de la Eglizia Katolika, la gerra sivil de Siria, el antisemitizmo ‘online’, los esfuersos de los Estados Unidos para arivar a un trato de pas en el Oriente Medio, la aktividad anti-İsrael, i el desenso del antisemitizmo en los Estados Unidos.

Abe Foxman, el direktor nasional de ADL esta diziendo ke el mundo judyo kere ke İran seyga realmente seriozo en akseptando a anular su programa de armas nukleares i arivar a un trato final’.

La partisipasion de la administrasion de Obama en las negosiasiones entre İsrael i Palestina, i la propozision del Prezidente para una solusion de dos estados en su vijita en el anyo 2013, es emportante por el puevlo judyo. Tambien las posivles konsekuensias negativas de la gerra sivil de Siria, i los danyos posivles de sus refujiados por la seguridad de İsrael.

Sovre la kestion de los derechos de los omoseksuales, la ADL se esta kreendo ke la Ley de la Defansa del Kazamiento es muy emportante para la komunidad judiya.

Segun la ADL, la ekstrema derecha se esta enfuertesiendo en munchos paizes evropeanos. Komo rezultado, el antisemitizmo esta pujando de diya en diya en el mundo entero. El Kongreso Judyo Mondial izo una demanda por la prohibision de los partidos neonazis en la Evropa.

Las atakas i el vandalizmo kontra los judyos pujo en los paizes de la Evropa, i de la Amerika del Sur, en el anyo 2013.

La prohibision de las leyes de la karne kosher en la Polonya (ke es motivado por el antisemitizmo) va ser un obstaklo por el futuro de los judyos ke biven en la Polonya.

Segun la ADL, el mundo judyo esta kontente de la eleksion del Kardinal Jorge Bergoglio de Arjantina, komo el muevo Papa Francis. Papa Francis ke es un amigo de la komunidad judiya, ekspreso su dezeyo de enfuerteser las relasiones entre los katilikos i los judyos.

A lo ke vimos en esta lista, la mas emportante kestion por el mundo judyo en el anyo 2013, fue el antisemitizmo ke esta pujando de diya en diya en el mundo entero.