Sukkot: La sinyifikasyon de Sukkot i el sekreto de bivir orozos

Sukkot:  La sinyifikasyon de Sukkot i el sekreto de bivir orozos

La fiesta de Sukkot empesa el 15 de Tishri i es el sinken diya duspues de Yom Kippur. Sukkot es una tranzision de las mas seriozas fiestas a la mas alegre. A las vezes, esta fiesta, la yaman Zeman Simkhateinu (Sezon de Alegriya). El biervo Sukkot sinyifika ‘kabinas’, ke es la Sukka ande kale bivir siete diyas.

Komo Pessah i Shavuot, Sukkot tiene dos sinyifikasyones: historiko i agrikultural. Esta fiesta komemora la epoka de kuarenta anyos kuando los judyos kaminaron en el dezerto, i estuvieron biviendo en refujios ke toparon. Sukkot es en mezmo tiempo la fiesta de arekojor los prodaktos agrikultural.

Para onorar muestros padres ke bivieron en refujios en el dezerto, en esta fiesta, los judyos deven de bivir siete diyas en las sukkas ke konstruizan. Una sukka deve de tener tres paredes, kon una kuvierta enriva ke no se va bolar en el ayre, i deve de ser sufizamente grande para ke la famiya entera pueda bivir siete diyas ariento. La sukka se puede dekorar kon prodoktos agrikultural.

En los siete diyas de Sukkot, los judyos tienen un orden divino de ser alegre. Todos keremos siempre ser alegre i bivir orozos, ma komo?

Komo los savios dizen: ‘Si no estas kontente kon lo ke tienes, nunka vaza ser kontente kon lo ke vaza obtener’.

Es verdad ke devemos de tener siempre objektivos en la vida. En los negosios, este objektivo, es de ganar mas munchas paras. La bibla dize: ‘La persona ke kere muncho las paras, nunka se va artar de ganar’.

Todos keremos bivir orozos, ma munchas vezes mos trompamos en pensando ke la reushita mos va azer mas orozos. ‘Reushir es alkansar a lo ke keres, ser orozo es ser kontente kon lo

ke tienes’. El riko es, el ke se kontenta de lo ke tiene. La persona no se arta de ganar. No ay fin de kerer. Siempre puedemos alkansar mas muncho de lo ke tenemos, ma fin asta kuando? Kuando vamos a tener tiempo de tomar plazer kon lo ke tenemos?

Bivir siete diyas en una Sukka modesta kon una meza i siyas de plastik!  Esto es el mas grande mesaje de Sukkot: ‘La persona puede ser oroza mezmo kon muy pokas kozas’. Este anyo, los judyos vana repetar lo ke izieron por mas de sien jenerasyones. Vana deshar sus kazas i sus konfores, i vana bivir alegre i orozos debasho de la Sukka kon muy pokas kozas.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın