Ekev

La persona no bive solamente kon el pan ke kome si no ke kon la diça i el orden del Kriyador. Ansi meldamos en uno de los versetos de la peraşa; Ki lo al alehem levado yihye aadam ki al kel motsa pi ad... yihye aadam.

Devemos de aplikar todas las enkomendansas ke mos enkomendo el todo poderozo. Moşe Rabenu nos kijo dizir, el ombre es valorozo en el mundo. El kriyador kriyo este mundo i no lo entrego a nozotros. El eskopo de el Kriyador es: ke nozotros ijos de hombre, devemos de sirvir a el. El hombre no asemeja a otras kriyansas. La kuatro pea i las aves ya vyenen a el mundo prontos kon sus vistimyentos i los atkuendos por defenderses tambien mismo sus mantenimyentos.

Vinyendo a el ombre, para komer un pedaso de pan, deve de arar i sombrar, de arekojer su produkto azer la arina i komer su pan. Ansi mizmo todo su mantenimyento por defenderse de los enimigos deve aprontar armas. Se entyende ke el hombre todo lo ke tyene menester deve de aprontarlo el mismo.

Komo meldamos en la Tora, kuarenta anyos en el dizyerto no tuvyeron menester de ningun aparejo, ni de vistir ni de komer. Si no ke el kriyador kon sus milagros grandes los giyo a el puevlo cudyo.

Dunke, agora ke ya estavan serke de entrar a la tyera  prometida. Ayi vana ser patrones de vinyas i kampos, patrones de kazas. Por esta kavza estamos enkomendados de parte el grande profeta Moşe Rabenu. Kuando vaza fraguar kazas, vaza plantar kampos i vinyas. No diras: Kon mi fuersa mi sensya i mi entelijensa parvine a tener esta grande furtuna no deves de olvidarte ke el kriyador es ke nos da la fuersa i la entelijensa de reuşir I parvinito por esta razon es diço: ke la persona no bive solo kon el pan. Ke kome, sino ke solamente kon la diça i el orden de Dyos. 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın