El ermano de Obama es Judyo

El ermano de  Obama es Judyo

Mark Ndesadjo, ermano de Obama, nasyo de la tresera mujer del padre de Obama, Barack  Obama (senior). La madre de Ndesadjo, Ruth Ndesadjo (ija de emigrantes de lituanos) es maestra de kreaturas chikas, en una eskola judiya en Kenya.

Mark Ndesadjo vijito İsrael los diyas ke pasimos. El viaje de Ndesadjo a İsrael se guadro de todos komo un sekreto, del espanto ke lo puediyan matar por vengarsen del asasinato de bin Ladin.

Uno de los prensipales objektivos de la vijita de Ndesandjo fue de toparse kon el Grande Rabino ashkenazi de İsrael, Yona Metzger, para resivir una bendision i una letra por su madre. Durante esta vijita, Ndesadjo vijito el Beth Amigdash, i los otros sitios en Yerushalaim, i en Tel Aviv. Yona Metzger disho ke Ndesadjo se empresiono muncho de konoser el puevlo israeliano, de los ermozos restoranes, i del entretenimiento de İsrael. Por razones de seguridad, Metzger refuzo de dar los nombres de los lugares ke Ndesadjo vijito.

Los lavorantes del buro de Metzger se enkantaron kuando vieron este envitado entranjero salir del asansor kon una rida debasho de una kipa en la kavesa. ‘Mezmo si no me diziya ke es ermano de Obama, yo ya iva entender porke parese muncho a su ermano’ disho Metzger, ‘Ndesandje me disho ke su madre todo le dize ke deve de ser muy orgoyozo de ser judyo, i ke deve ayudar a sus ermanos judyos’.

Del diya ke arivo a İsrael, Ndesadjo avlo munchas vezes kon Obama, todo estuvo en kontakto reguliar par telefon.

Antes ke patra de İsrael, Metzger le rogo de azer una favor por el puevlo judyo. Esta favor va ser de konvenser Obama de liberar Jonathan Pollard, ke fue kondemnado por la vida entera en los Estados Unidos, por espionar por İsrael, en el anyo 1986. Ndesadjo aksepto de penar por esta demanda.

Ndesadjo estudio fizika en la Universidad Brown i Stanford, i tiene MBA de la Universidad de Emory. En el anyo 2002, se fue a la China ande se kazo kon Liu Xuehua. En el anyo 2009, Ndesadjo publiko una otobiografiya kon el titro ‘De Nairobi a Shenzhen: un Roman de Amor’. Aparte de la estoria de amor, Ndesadjo eskrivio sovre su chikes, i lo ke era ser engrandesido por un padre alkoholiko i agresivo.

Ndesadjo es el administrador de una kompaniya de İnternet, World Nexus, ke es konsejora de kompaniyas chinas en los marketes enternasionales.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın