La koloniya de burgaz

La koloniya de burgaz

“LA KRİATURA NASE

LA KRİATURA BİVE

LA KRİATURA KORYE, LA KRİATURA SALTA

LA KRİATURA KERE BYEN,

LA KRİATURA ES EL AVENİR TAMBYEN”…

Keridos Lektores,

Alhad ultimo fue la avyertura (açılış) de la koloniya de Burgaz;  ke tyene komo dover de azer pasar un enverano yeno de kultura i de ambezamyento  a las kriyaturas de 6 a 13 anyos.  Es una misyon sakra ke se realiza kon una armada de volontaryos ombres komo mujeres, profesyonales i profesores sovre lingua etranjera komo el ingles, pintura, muzika, estatua (heykel), azer coyas (takı), natasyon (yüzme) i munchas otras aktivitades para desveloparlos (geliştirmek) en todo modo punto de vista.

Este anyo 80 kriyaturas vana vinir para pasar el enverano en periodas (dönem) diferentes i para profitar del aver limpyo, de la mar, de la vida sosyal kon los otros .

El tereno (arsa) de la koloniya fue la donasyon (hibe) de “Pepo Danon” (z.l.) Volontaryos komo;

“Moiz İşman”, “Giacomo Afnaim”, “Ester Tani”, “Suzan İşman” (z.l.)  lavoraron de alma i korason para la fabrikasyon de esta fragua kon el architekto “Jak Pardo” ke konstruizo este edifisyo.

En el enverano de 1983 , mi marido Meir empeso a lavorar komo volontaryo en el tyempo del presidente “Henri Ruso” (z.l.). Henri Ruso teniya una personalitad ke enşuensava (etkilemek) al den frente.

De vez en kuando dulse, de vez en kuando severo (sert), de vez en kuando sangrudo (nüktedan) ma syempre korekto (dürüst).

Su mujer “Lote” abrasava (kucaklamak) kon sus ojos a todos los volontaryos i las volontaryas.

“Hayim Marküs” (z.l.) era un ombre djusto, korekto ke mos ambezo a lavorar kon plazer, ke mos ambezo lo ke es la kerensya de las kriaturas, ke las kriaturas son el avenir (gelecek) de un puevlo.

Todos los tres mos ambezaron komo ser un umano (insan), una persona komo kale, i la kerensya de las kriyaturas.

Munchos presidentes kon sus ekipas lavoraron anyos largos kon un esforso grande para enalteser esta organizasyon i para ver a los chikos orozos.

La famiya “Sadioğlu” reorganizo esta fragua, la modernizo kon sus donasyones.

La munisipalita (belediye) de las islas los kamina kon barkas (tekne) para ambezarles la istorya de todas las islas.

Siguramente para pueder realizar esto todo kale una ekipa de volontaryas  ke lavoran  dia i noche. Las dammas de  esta ekipa son laboryozas i produktivas (üretici), i son de vez en kuando madre, de vez en kuando ermana, de vez en kuando profesora, de vez en kuando gizandera…. La prezidente de esta ekipa;

“Meri Schild” es una mujer perfekta, una madre sin defekto (kusursuz), una granmama yena de amor i una ija akorrida.

“Hayim Mitrani” kon “Moris Kohen” son dos ermanos ke korren a todo modo de koza i solusyonan los problemes.

La direktrisa de esta eskola de vakansas “Ventura Gönceer” se okupa de todos los chikos, de sus famiyas, del personel, de la limpyeza i de otras kozas.

Es la enerjiya ke tenemos entre mozotros, la kerensya ke mos da la fuersa de lavorar kon grande amor.

LA KERENSYA es el sol ke pasa delantre las nuves.

LA KERENSYA es saver dar la valor, es akseptar el derecho de bivir del den frente.

LA KERENSYA es akseptar la igualita (eşitlık).

LA KERENSYA es la konsensya (bilinç).

LA KERENSYA ES SER PERSONA.

Esto fue la avla de Meir GAON, el presidente de la koloniya, alhad ultimo.

Los aparejos fueron muy reushidos kon la ayuda de las volontaryos.

Malorosamente mizmo ke el tyempo no estava muy kayente, poka djente asistyo a este evenemento.

Dingun dirijente de las organizasyones no asistyeron por kavzas diferentes i no embiyaron ni un reprezentante (temsilci) de sus ovras.

El presidente de la koloniya “Meir Gaon” kon la presidente de las mujeres “Meri Schild” se atristaron de esta situasyon.

La avla de Meir Gaon; sovre las kriyaturas, sovre la istorya de la koloniya, sovre los volontaryos i mas i mas sovre la Kerensya; plazyo muncho al presidente de la munisipalita de las islas, i a los otros dirijentes ke asistyeron.

Pekado a los ke no tuvyeron entereso (ilgi) de asistir a la avyertura de la koloniya en Burgaz!.....

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın