Global gerra kontra el antisemitizmo

La lektura del asistente del ministerio de aferes eksteriores en la

Global gerra kontra el antisemitizmo

‘El antisemitizmo no es solo un problema de los judios i de İsrael, ma es un problema de kualsiker sosiedad ande se permete de manifestarlo’ disho Zeel Eklin, el Asistente del Ministerio de Aferes Eksteriores, en la Global Gerra Kontra el Antisemitizmo, en Yerushalaim, el martes ke pasimos. ‘Kale ke ayga una politika de ‘zero tolerensia’ en los governos i parlamentos del mundo entero, kontra las manifestasiones de antisemitizmo.

Segun Eklin, la Komunidad Enternasional kale ke lavoren todos endjuntos para trokar esta realidad de oy. Serkano unos kuntos anyos, estomos viendo ke, partidos politikos kon politikas rasistas i ekstremistas, estan kresiendo de diya en diya en el mundo entero. Estos partidos, mas no se estan avervuensando de suivar estas politikas. De diya en diya, las Sinagogas i otros batimentos komunal judios tienen menester de mas muncha seguridad, i en siertas sivdades en el mundo, esta danjerozo de kaminar kon una kipa en la kavesa.

La vieja hazinura de antisemitizmo nasio de muevo en una forma mueva, ‘el moderno antisemitizmo’, i se esta ekstendiendo en komunidades muevas.

Algunas komunidades se estan eskondiendo detras ‘el odio de anti-İsrael’. İsrael esta pronto de akseptar kritikas de sus aksiones, de sus desiziones, i de sus politikas, ma a kondision ke muestro pais no se enkontre kon tratamientos diferentes, i ke todos aksepten su egzistiensia, i su derecho de egzistir’.

En referando a Iran, Eklin disho ke sus dirijentes estan inyegando el Holokosto, i estan lavando las kavesas de los mansevos kon este odio.

‘No solo keren la destruksion del estado judio, ma estan aziendo todo lo posivle para developar el aparato nuklear militar ke va ser muy danjerozo por la rejion, i por el mundo, ma espesialamente por Israel.

La komunidad enternasional no se enteresando de este aparato danjerozo, i ademas, estomos viendo un komporto pardonavle a la negasion del Holokosto de Iran, i a las deklarasiones antisemitas de sus dirijentes, espesialamente de su prezidente ke se esta sintiendo komo ke esta en su kaza, en munchos paizes en el mundo.

No solo en el mundo arabo, ma mezmo en el Konsejo de Derechos Umanos de Genova, İsrael esta sufriendo la diskriminasion, i esta sintiendo el mezmo komporto’.

‘Ma, no devemos dezesperarmos’ disho Eklin. ‘El puevlo judio tiene munchos amigos en todas las rejiones. Munchos lideres relijiozos i politikos estan kondemnando el antisemitizmo, i estan akseptando la egzistensia del antisemitizmo, diziendo ke esto va ser el primer paso en la gerra kontra la diskriminasion. İsrael tiene menester de la ayuda de sus amigos en la gerra kontra el muevo antisemitizmo, en el odio i la opozision a la egzistensia de İsrael ke se esta konvertiendo en la forma la mas danjeroza del antisemitizmo.

Vos esto remersiendo por la resepsion de este Global Forum, en esperando ke vamos a reushir a trokar munchas kozas. Los antisemitos, en la istoria, penaron muncho para ke los judios se sientan solos. Muestra reunion de esta noche les va embiar un mesaje fuerte: ‘Las komunidades judias i İsrael (la sola patria del puevlo judio) no esta sola, i nunka vana estar sola. 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın