Women of the wall

Women of the wall

‘Women of the Wall’ es una organizasion de mujeres ke tienen komo objektivo, garantizar los derechos de las mujeres, de azer sus orasiones a boz alta, kon el tallet i la kipa en el Kotel, komo lo azen los ombres. Estas aksiones estan deranjando los miembros de la komunidad ortodoksa, i los ortodoksos i las mujeres se estan ensultando de parte a parte. Munchas vezes, esta salyendo pletos grandes, las mujeres estan maltratadas, i la polizia estan kedando ovligados de echarlos al prezo.

Los 48% de los israelianos estan dando apoyo aesta organizasion de mujeres. El Prezidente de la organizasion ‘Women of the Wall’, Anat Hoffman, avlo a las gazetas sovre este sujeto: ‘Durante vente i kuatro anyos, kontinuimos a ir al Kotel kon un solo objektivo en la kavesa - azer muestras orasiones komo komunidad judiya de mujeres judias, kon la Tora, el talled i la kipa. Por modo de esta gerra, sali a las gazetas, i mezmo entri al prezo. Del empesijo, la sola koza ke kije fue de obtener mis derechos komo mujer judiya, i azer mis orasiones en el lugar el mas santo de los judios. La semana ke pasimos, el juzgador, Moshe Sobel, del Tribunal del Distrikto de Yerushalaim, reusho a kitar una desizion diziendo ke la orasion de muestro grupo no es kontra la tradision lokal. Esta desizion mos esta permetiendo de azer muestras orasiones en el Kotel komo lo azen los ombres, sin espanto deser maltratadas. Esto es una viktoria revolusioner. La mezma semana, mos topimos kon Natan Sharansky, para diskutar su plano de apartar una seksion de orasion para las mujeres, en el Kotel. Empesi a resivir felisitasiones del mundo entero, komo si la gerra se eskapo. Ma, la gerra no se eskapo dainda. Komo es en la politika, los detayes es lo mas emportante. La desizion del Tribunal reusho a aretar el malkomporto ke mos izieron en los mezes ke pasimos. Esta desizion es solo una garda de muestros derechos. Agara estomos mas repozados, porke ya savemos ke no vana pueder mas maltratarmos. Ma, dainda no se puede dizir ke ‘El Kotel es la kaza de orasion de todos los judios’. Para ke esta gerra eskape por entero, todos los ke pensan al futuro del Kotel, deven de partisipar al proseso de Sharansky, para pueder trokar el status del Kotel. Es por esta razon ke esto dando apoyo a los esforsos de Sharansky, i tengo la entision de ser su partener konstruktivo. Muestra gerra por libertad va kontinuar, i dinguna boz no va pueder limitar la libertad de dingun koriente judio.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın