La Sola Gazeta De Kada Semana Ke Tiene Una Oja En Ladino

La semana ke pasimos, en una gazeta israeliana, aviya un artikolo sovre muestra gazeta Shalom, diziendo ke Shalom es la sola gazeta en el mundo entero, ke tiene una oja en Ladino ke se publika kada semana.

Esta semana vos kije azer el rezume de este artikolo.

Kuando Avram Leyon, el fondador de la gazeta Shalom, se izo hazino en Estambol en el anyo 1983, kijo serrar la gazeta, porke mas el no estava puediendo dar su enerjiya para kitar esta gazeta kada semana. Ma, los lideres de la komunidad judiya de Estambol, pensaron ke deven kontinuar a publikar ‘Shalom’ kada semana.

Kon los esfuersos de Avram Leyon, ‘Shalom’ salyo kada semana desde el anyo 1947. Akeyos tiempos, la publikasion de las kuatro ojas de la gazeta eran enteramente en Ladino. Los muevos lideres de la gazeta pensaron ke la lingua de ‘Shalom’ kale ke seyga en turko, porke mas los judios turkos no estavan avlando en judeo-espanyol en kaza. Los judios turkos estavan avlando en turko en kaza, i se estavan ambezando en ingles i en franse en las eskolas. Empesando del anyo 1983, la gazeta empeso a publikarse en turko, ma la una oja de ‘Shalom’ kedo eskrita en Ladino.

Oy, Shalom se publika kon vente ojas kada semana. En las grandes fiesatas judiyas, la gazeta se publika kon vente i ocho ojas. ‘Shalom’ tiene un website, un kuento en Twitter, i una oja en Facebook. Los eskridores volontarios eskriven artikolos kon diferentes temas, lo mas, novelas sovre la komunidad judiya de Estambol, i los judios del mundo entero. Aparte de las novelas judiyas, ay diferentes artikolos sovre ekonomiya, sports, teknolojiya, pedagojiya, arte etc. Aparte de esto, la gazeta publika un periodiko turko ‘ Shalom Dergi’, i un suplemento ‘El Amaneser’ kada mez.  ‘El Amaneser’ se produiza por el Sentro Seferadi ke es un instituto bazado en el mizmo edifisio de la gazeta.

Fin oy en diya, la oja ke es eskrita en Ladino, fue la sola oja en el mundo entero ke se publika en Ladino kada semana.

Ay munchos esfuersos en los sentros akademikos del mundo sefaradi porke esta lingua no se muera. Segun Rashel Bortnick, en el mundo entero, kedo mas poko de 100.000 a 150.000 avlantes de judeo-espanyol.. Ma oy ay un entereso renuvelado en el mundo akademiko para estudiar esta lingua. Estos esfuersos mos estan dando esperansa por el Ladino, no komo una lingua ke se va avlar, ma komo una tema de estudio en las Universidades de Tufts, en los Estados Unidos, fin a la Sorbone de Paris. Estas universidades estan ofriendo kursos en esta lingua.

Segun Rashel Bortnick, munchos faktores espertaron este entereso entre los akademikos. Manasevos judios enteresados en los estudios espanyoles o hispanos, estan viendo una koneksion kon el judaizmo a travers el Ladino.

Komo disho Eti Varon, Ladino no es solo una lingua, ma es una kultura entera kon las komidas, las kantikas, los kuentos, las dichas, los proverbos etc...

Oy, el grupo Ladinokomunita, ke es inisiado por Rashel Bortnick, i organizado por Yahoo, tiene mas de 1400 miembros de 45 paizes. Bortnick esta diziendo ke este grupo reunio los miembros del mundo sefaradi a traver de las frontieras nasionales, los judios ke de otra manera no tenian forma de komunikasion.

‘Por esta razon’ esta diziendo Bortnick, ‘esto pensando ke vale la pena de savlar esta lingua del olvido.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın