El muevo Papa es amigo de los Judios

El muevo Papa es amigo de los Judios

Judios, en el mundo entero, estan kontente del muevo Papa elijido, i le disheron ‘bienvenida’el diya de mierkoles, el tredje del Marso.

Su reaksion fuerte kontra la ataka del anyo 1994, en Arjantina (la mas grande ataka en la istoria del pais), lo izo aserkar mas muncho a los judios.

Riccardo Di Segni, el Grande Rabino de Roma, amostro su satisfaksion kon estos biervos: ‘Por lo ke oyi i meldi, del momento ke fue elijido por este posto, Fransisko I amostro profondos sinyos de respekto, i amistad por los judios. Esto es un buen punto de empesijo’.

Rabino David Rosen, el Direktor Enternasional de las Relasiones Enterrelijiozas en la Komite Judiya Amerikana, tambien avlo sovre este sujeto: ‘De kuando era el Arkbishop de Buenos Aires, Fransisko teniya buenas relasiones kon la komunidad judiya de Arjantina, i era amigo kon los grandes rabinos’.

Las relasiones entre los judios i los katolikos se avian mijorado en el tiempo de Konsilio Vatikano II (1962-1965), kuando la Eglizia aviya tomado una kondukta firma kontra el antisemitizmo, i de las bozes ke los judyos son responsavle de la muerte de Jezu. Ma, las relasiones se deterioraron en el tiempo del Papa Benedikto XVI.

Lideres judios obzervaron ke la edad de Fransisko I (tiene 76 anyos), es emportante por la komunidad judiya, porke el Holokosto afito durante su vida, i el muevo Papa deve de tener rekuerdos de los orores del Holokosto.

‘Me va gustar de ver una renovasion en las relasiones entre los judios i los katolikos, komo era en los diyas de Juan Pablo II’ disho David Novak, Profesor de los Estudios i Filozofia Judiya en la Universidad de Toronto. Komo lo savemos todos, uvo problemas en estas relasiones durante el tiempo del Papa presedante.

En el tiempo de Jean Pablo II, la Santa Seole rekonosio el Estado de Israel en el anyo 1997. Juan Pablo II fue el primer Papa ke vijito Auschwitz para bendizir İsrael, i para demandar pardon por los aktos de los kristianos kontra los judios.

Grupos judios, tambien, disheron ke Fransisko I va dar grande emportansa a las temas de justisia sosial ande los judios i los katolikos vana pueder lavorar endjuntos. ‘Durante el posto komo Kardinal de Buenos Aires de Fransisko I, la asosiasion judiya i la eglizia katolika gerreyimos endjuntos kon la provedad. Esperamos ke vamos a kontinuar de la mezma manera’ disho el Rabino Steve Gutow, Prezidente del Konsejo Judio de las Relasiones Publikas.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın