La ventana de vuestra ermana: LA VEJEZ

La ventana de vuestra ermana: LA VEJEZ

El invyerno  yelado  kon las luvyas i la inyeve, el  tyempo ariskuro i ennuvlado, los dias kurtos; toda  esta atmosfera eskura de la sezon traye el pesimismo i es proporsyonada kon el korason de la persona. Este tyempo ariskuro me traye al tino la soledad i la vejez, i por esta kavza el invyerno para mi es una sezon ke no me plaze.

La vejez es una periyoda ke no eksprime nada en la manseves. El dezeo de todas las personas es; una vida larga kon sanedad i entornados kon todos sus keridos, komo la famiya, amigos i amigas...

Kale bivir la vida muy yena i por esto; kale meldar muncho para kultivarmos i no olvidar, viyajar, azer spor, kaminar en el bodre de mar para respirar el aver limpyo,  i munchas otras aktivitades.

Kuando mos estamos olvidando un nombre u un byervo; mos estamos atristando en pensando ke la memorya (hafıza) ya mo se fue.

La vejez empesa despues de los sesenta i sinko anyos. Ma, ay personas ke mizmo en los noventa anyos se syenten komo de setenta.  Esto es el karakter de la persona, la amor de bivir, i kontinuar a azer todo komo en la manseves.

No kale ser pesimistos, para no afedentar al den frente. Yo penso; ke todas las periodas en la vida de una persona tyenen una valor diferente. Kon la edad, la eksperyensa puja, i la mirada de la persona troka; el komporto, la tolerensya, la aprovasyon (kabullenmek); todo deviene mas positivo.

De vez en kuando mos sintimos muy kansoz, enfasyados (bıkkın), dezganados, abatidos i aedados.

Kuando keremos empesar una tentativa (girişim) mos dizimos entre mozotros “Ya es muy tadre para mi ! Ya me envyejesi. Kaliya ke lo azyera antes anyos”, i otras eskuzas (mazeret).

No kale asperar, no kale pensar al tyempo ke paso; ma kale topar la fuersa para azer oy mizmo lo ke dezeamos de azer. No es tadre nunka; kuando se kere veramente. Kerer azer una koza ,es la miyata de la reushitad.

Vos kero dar unos kuantos egzempyos; de las reushitades de las personas dal tyempo.

- Kristof Kolomb era mas aedado de sinkuenta anyos; kuando salyo a viajar por la primera ves por deskuvrir (keşfetmek) la Amerika.

- Pastor kuando topo el vaksen de kuduz teniya sesenta anyos.

- Goethe; aviya terminado su mas grande ovra “Faust” en los  ochenta anyos.

- El arkitekto turko Mimar Sinan; teniya mas de setenta anyos kuando termino la meshkita Süleymaniye.

  La persona es manseva; si tyene konfiensa a si, si es korajoza, si tyene esperansas. Lo ke envyejese a la persona es ke enterra sus ideales.

-El ke ve lo ermozo ,no se envyejese nunka. Envyejeser es komo suvir una montanya. En suvyendo la kanserya puja, la respirasyon  se estrechea, ma la vista, la mirada de la persona se anchea.

- La vejez traye endjuntos la soledad. Kale tomar las prekosyones (önlem) de la soledad en la manseves. Kale desvelopar ( geliştirmek) relasyones pozitivas kon el entorno, formar fuertes relasyones familyales, dar emportansa a la vida sosyal, azer para si, hobis komo desinar, ambezar una lingua, dar emportansa a las vijitas de las fyestas, vijitar los hazinos, i munchas otras kozas.

- İyir al doktor por las dolores, i para ser egzaminados por ver si estamos sanos i rezyos, iyir a las organizasyones de vyejos para topar amigos, salir i kaminar en la natura, ver a los inyetos; esto todo es una terapi para pueder produisar (üretmek) solusyones para la vejez.

  La persona ke pyedre su kompanyero en la vida; se syente mas asolada i mas triste. Porke estar dos personas en una kaza es un buto de bivir. Azer lo ke tyene menester el den frente, azer sus plazeres es una motivasyon para la persona. İyir a emplear, gizar, lavar   son aktividades para pueder kontinuar a bivir komo se kere. Si es una persona sola, no tyene gana de gizar, komer i azer kualker koza.

La vejez es una periyoda de muestra vida ande ay varyasyones (değişim) i adelantamyentos (gelişim).

 La soledad no es solo; la tristeza, no tener apoyo de dingunos, ser abandonado, es tambyen; abasteser para si, estar enpyes de si para si, es produisir, ser produktivo (verimli) i kreativo (yaratıcı)

Esto depende de la persona, i mostra diferensyas, sigun el lugar, el tyempo i la kultura del pais ande se bive.

 Komo dize un eskrivano konosido;

“ El sentimyento de la soledad, es una nosyon ke apartyene al interyor de la persona i no se puede partajar. Si se puediya partajar; no i va ver la soledad”.

 Keridos lektores; kreygo ke vo se enserro las alas del korason kon esta eskrita intitulada

 “La Vejez”.

Eskrivi, lo ke penso i lo ke syento sovre este sujeto.

Esperamos ke amanyana ya mos va naser el sol!.....

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın