LA UMOR JUDIYA

La umor judiya se burla de munchas kozas, de la vida de los judyos, del antisemitizmo, de muestra amor por paras, del komerso, de la relijion, de muestras tradisiones, de la madre judiya, de la famiya judiya, de munchas kozas ke mos enteresa.  Mezmo, munchas vezes mos aze riyir de las situasiones ke son de yorar.

La umor judiya es muy tolerente. Tenemos munchos kuentos ke kritikan mezmo muestra relijion. Mozotros, en los kuentos, kritikamos solo los judyos, ma nunka no mos burlamos de las otras nasiones. Por egzamplo, no kritikamos el komporto de los Nazis kontra los judyos, ma mos burlamos del komporto de los judyos kontra los Nazis.

- Es el tiempo kuando los Nazis empesaron a arekojer a los judyos, para yevarlos a los kampos de konsantrasion. Moshe esta biviendo en Berlin. Un diya, un ofisye alman lo areta en la kaye, i lo forsa de komer lo suzyo de un kavayo. Moshe no tiene remedyo, se aboka, i empesa a komer. Del gusto, el ofisye se mete a riyir; tanto se riye ke el fuzil le kaye de la mano. Presto, Moshe apanya el fuzil, i le dize: ’Agora es el torno tuyo de komer este suzyo’. El ofisye no tiene remedyo, se aboka, i se mete a azer lo ke dize Moshe. Antes ke vengan otros, Moshe echa el fuzil de la mano, koryendo se fuye de aya. Kuando viene a kaza, Rashel le dize: ‘Deke tadrates este karar Moshe? Kedi en mirikiya’. ‘Endivina veremos Rashel, saves kon ken komi esta midi?’

Mezmo ke nasyo en un sentro relijyozo, la umor judiya es muy tolerente. Los judyos amostran grande tolerensya mezmo por la relijion.

Lo mas esansiel de todo en los judyos, es la famiya. La madre i el padre judyo azen todos sus puederes para ke sus ijos adelanten. Lo mas la madre judiya. La madre judiya (komo dizen yiddishe mama en la literatura), es mas fuerte del padre, i le pasa mas muncho la palavra kon los ijos.

Mme. Kohen lo embiya al ijo a la Amerika, para ke estudye en la universidad. Pasa un tiempo, un diya el ijo le telefona:

- Mama, yo deshi la eskola

- Bueno pahsa.

- Me kazi.

- Bueno pahsa

- Tomi una mujer kristiana

- Bueno pahsa

- Me nasyo una ija

- Muy ermozo pahsa

- Estomos vinyendo a verte

-Muy bueno pahsa

- La estomos trayendo i a mi esuegra

- Muy bueno pahsa

- Mama, mos vaza apartar una kamareta para kada uno

- Si pahsa

- Bueno, i tu, ande te vaza echar?

İ yo me va echar de la ventana abasho.

El shastre Avram eskapo de kuzir el kostum de su kliyente. El kliyente se lo esta aprovando una vez dalkavo, antes de tomarlo.

- Avram, me esta paresyendo ke el ombro derecho esta un poko kayendo.

- Alevanta un poko el otro ombro. Vites komo se enderecho agora.

- La yaka no esta un poko tuverta?

- Yeva la kavesa un poko par atras. Ah, agora esta bueno.

- Ke dizes? La jaket no esta un poko larga por detras?

- Abokate un poko para delantre. Vites, agora se enderecho.

El kliente toma la jaket, i se va. Dos amigos de Avram lo ven salir del apartamento.

- Ke buen shastre este Avram’, le dize el uno al otro. ‘Mira ke ermozo kotsum ke le kuzyo mezmo a este charpeyado.

 Los kuentos de politika estan muy populer estos diyas.

 Ahmed-i Nejat le telefona a Obama, dizyendo ke tuvo un esuenyo, ke tanto lo alegro, ke no se puido detenerse de telefonarle.

- En mi esuenyo, los Estados Unidos se aviyan konvertido en un payis muslumano. Las karas de las mujeres estavan serradas kon velos. Todos teniyan el Koran en la mano, i paresiyan muy orozos. Enriva de pankartas estava eskrito ‘Bienvenidos a los Estados Unidos de Iran’.

- İ yo, djusto me estava aparejando para telefonarte’, le dize Obama. ‘Un endivino me vijito el otro diya. ‘Sinyor prezidente, me disho, esto viendo en la agua, un grande payis muy leshos.. La djente estan kantando, baylando en las kayes. Los ombres visten shortes, i kamizas aviertas. Las ijikas kon dekoltes, i fostanes mini. Ke esto viendo? Estan kemando los velos de las mujeres. Todos tienen pankartas en la mano, kon grande eskrituryas enriva.

- Ke esta eskrito enriva? Ke esta eskrito enriva?’ le demanda Ahmed-i Nejat kon grande kuriozito.

  - No entendi nada’ le responde Obama. ‘es en ebreo.

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın