El djugueves ke pasimos, uvo una grande resepsion de Hanuka en White House. El Prezidente Obama envito seshenta personas para selebrar la fiesta de Hanuka. Akompanyado por ‘la primera lady’ Michelle Obama, el Prezidente se estuvo al lado de una menora de bronzo de noventa anyos, ke fue savlada de la Sinagoga İsrael de Long Beach, Long İsland, en la hurikan Sandy. La menora de siete ‘feet’ de altor, puido ser savlada, ma malorozamente los sesh rulos de Tora fueron destruidos.
Duspues ke konto la estorya de los Makabis, el Prezidente disho a sus envitados ke Hanuka es una estorya de ‘optimizmo i de rezistensia’. El ambasador israeliano Michael Oren, miembros del Kabine del Prezidente, miembros del Kongreso Elena Kagan i Ruth Bader Ginsburg, Lideres del Tribunal de Justisia, lideres de los djudios laikos i relijiozos del pais entero, asistieron a esta resepsion. El rabino de la Sinagoga İsrael de Long Beach, ke trusho la menora a Washington, tambien estuvo prezente en la selebrasion de Hanuka.
El Rabino Laurence Bazer de las Fuersas de la Garda Nasional de Massachussets asiendo las kandelas, i disho la orasion de Hanuka. Los otros envitados, tambien lo akompanyaron en diziendo la orasion. Obama disho a los envitados, ke el Rabino Blazer devia asiender la menora en las fiestas pasadas en White House, ma komo Blazer era el solo rabino en Afganistan, el no puido ser prezente en las otras selebrasiones.
Antes de asiender la menora, Obama kontinuo su deskorso kon estos biervos. ‘El Rabino Blazer i esta menora son los semboles de la esperansa i de la perseveransa’ disho Obama, ‘fin oy en diya, los judios en el mundo entero onoran la esperansa de los Makabis ke la luz va derrotar la obskuridad, la buendad el mal, i ke la kreesia puede azer miraklos. La menora ke estomos empleyando esta noche, i el ombre ke la va asiender son los semboles de la luz, la buendad i la kreensia. Esta menora de noventa anyos, mos va servir otros noventa anyos. Por esta razon, esta briyando komo el sembol de la rezistensia de los Makabis. Estomos rogando ke la luz de esta menora ke fue savlada del dezastro, trayga un mijor futuro a las viktimas de Sandy i a todos los amerikanos.
El Rabino Bazer disho ke esta noche no es solo la sejena noche de Hanuka ma tambien es el sejen anyo ke White House esta selebrando esta fiesta judiya.
Mas duspues, los envitados disheron la orasion de Hanuka, i el rabino asiendo las kandelas.
En el menu espesial de esta noche, el personel de White House servieron las komidas tradisionales de los judios i de Hanuka, a los envitados.
