El maestro robot

El maestro robot

El maestro robot fue developado de la parte de dos israelianos: el Profesor İgal Werner del Technion, i el Profesor Polishuk Alrx, ke es el direktor del Sentro Robotiko del Muzeo Nasional de la Siensia. Dr. Takuya Hashimoto de la Universidad de la Siensia de Tokyo, los ayudo en aziendo este primer paso.

Werner i Polishuk eksplikaron los karakteristikos del maestro robot. El robot tiene kapasidades de azer muvimientos, diferentes ekspresiones de kara, avlar i komunikar. Las aktividades del robot son programadas, i kontroladas por la parte del teleoperasion.

El maestro robot da eksplikasiones enriva de las lekturas, orienta los eksperimentos de los elevos, responde a las kestiones de la klasa, i saluda los elevos al empesijo i a la fin de la leson.

Werner i Polishuk estan diziendo ke los eksperimentos, las eksplikasiones de las lekturas, i los saludos son programados antes de la leson, ma las kestiones i las repuestas a las kestiones son realizadas en akel punto, por la parte de la teleoperasion. El operator de la teleoperasion obzerva la klasa, oye las kestiones de los elevos, i duspues les da las repuestas.

‘Muestro objektivo es de avrir un muevo kanal edukativo, i atraktivo por los elevos, ke los va ensenyar, i entretenar en mezmo tiempo’ estan diziendo los dos profesores, ‘el objektivo de esta envasion es de investigar los prensipos de ‘ambezar i ensenyar’ kon la metod de la interaksion entre el elevo i el maestro robot’.

‘Yo siempre kije ver el entereso i la motivasion de los elevos chikos en la siensia, i la teknolojiya, en empleyando esta mestod. Pensi ke, kon esta metod los elevos se vana enteresar mas muncho a la leson, i se vana ambezar mijor. Ma, no kale olvidar ke un robot no puede ramplasar un maestro umano’ esta diziendo Takuya.

Segun Karin Mayir Rubinstein, el CEO de las Teknolojiyas Avansadas de İsrael, ‘esta metod es un otro grande ekzamplo de las inovasiones ke salyeron de İsrael. La teknolojia israeliana esta kontinuando a azer grandes developamientos en kada kampo. İsrael no es solo la nasion de los empesijos, ma en mezmo tiempo, es la nasion de las inovasiones, ke atira la atansion de las firmas las mas influyentes del mundo, komo Google, Apple, Microsoft, i Intel. Estas grandes firmas lideras vieron la rikeza de İsrael komo su kapital umano, i la ekosistema de inovasiones, i se desidaron de realizar la kreasion de sentros 1+D en el pais entero, ke va permeter mantener una ventana teknolojika a los kompetidores’.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın