EL GANADOR DEL PREMIO FRANSE DE LİTERATURA, MEDİCİS

EL GANADOR DEL PREMIO FRANSE DE LİTERATURA, MEDİCİS

El eskritor israeliano A.B.Yehoshua gano el premio franse de literatura, Medicis, por su livro traduizado de ebreo, ‘La Retrospective’. El eskritor, de edad de 75 anyos, es el ganador de munchos premios enternasionales. Sus livros fueron traduizados a mas de trenta linguas.

‘La Retrospective’ es una istoria melankolika sovre los sekretos de una ovra de arte. Este livro fue publikado en ebreo en el anyo 2011.

Desde el anyo 1958, kada anyo, un eskritor resive este premio en el mez de Novembre. En los primeros anyos, solo un eskritor franse puediya resivir este premio, ma duspues del anyo 1970, eskritores etranjeros empesaron a resivir este premio por sus livros traduizados al franse.

‘La Retrospective’ es la istoria de un direktor de sinema, Moiz Yair,  ke arivo a Santiago de Kompostela, en Espanya, kon una artista, Ruth, para una retrospektiva al onor de sus filmos. En la pared, ensima la kama de su kamareta en el otel, Moiz deskruvio una reproduksion de una pintura, ande una mujer manseva esta dando teta a un viejo prizoniero. La pintura era sovre una tradision evropeena de la data de la Karidad Romana. Ma, a Moiz le parisio ke esta pintura era sovre una sena ke iva tomar lugar en su sieten filmo. En tornando a Israel, Moiz i Ruth azen un viaje fiziko i mental en el pasado.

Avraham B. Yehoshua nasio en Yerushalaim, en el anyo 1936. El eskritor eskrivio mas de trenta livros, i es konosido por ser aktivo en la politika. En el anyo 2007, Yehoshua gano el premio ‘Los Angeles Times Book Prize’ por su livro ‘A Woman in Jerusalem’. Este livro fue adaptado al filmo ‘The Human Resources Manager’.

Yehoshua es tambien popular en Fransia, ande bivio tres anyos, en los anyos de 1960. ‘Este livro es muy spesial por mi porke so atado a Fransia’ esta diziendo el eskritor, ‘ademas la seremonia del premio, kada anyo, se aze en el karye ke yo bivi en mi manseves. Era la primera vez ke estava biviendo afuera de İsrael, i mi primera eksperiensa en la Evropa’. Yehoshua esta diziendo ke, akeyos anyos, en İsrael, aviya una grande kreatividad  en la muzika, en el teatro, i en el sinema, komo lo fue en la Evropa, entre las dos gerras. ‘Kuando ay problemas politikas, komo lo es oy kon İran, el atmosfer kree una kreatividad en el arte’.

Otro famozo eskritor israeliano, David Grossman, gano el Premio Medicis en el anyo 2011, por su filmo ‘To The End of The Land’.

Los livros de Yehoshua son muy konosidos en İsrael. El eskritor esta biviendo en Haifa, ande ensenyo i servio komo ‘Dekante de los Elevos’, en la Universidad de Haifa. De la parte de su padre, su famiya bivio en Yerushalaim desde sinko jenerasiones. Su madre es del Notre de Afrika. Asta los anyos 1970, sus livros eran yenos de suspensia i de alegorias. En este aspekto, Yehoshua parisio a Kafka. El eskrivio istorias en kestionando la baz del nasionalizmo del estado, en las memorias de un viejo.

‘The Lover’, su livro sovre la gerra de Yom Kippur, kompleto el muvimiento en el realizmo. En este livro, el eskritor esta balansando el reel kon el grotesko, en la prezantasion del puevlo de İsrael. ‘A Late Divorce’ es un livro sovre la vida en las famiyas, i en la sosiedad. Sus piyesas ‘A Night in May’, i ‘Objects’ tienen temas asemejante a sus livros.

Yehoshua sustiene la idealojia de ‘İsraelizmo’ kontra ‘Judaizmo en İsrael’. El eskritor, oy en diya, esta kontinuando a eskrivir, a dar lekturas, i a ser un aktivisto en la politika. En mezmo tiempo, esta kontinuando su posto komo profesor en la Eskola de Teatro en la Universidad en Haifa.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın