Ludwıg Guttman - fondador de los djugos paraolımpıkos

En el anyo 1917, Ludwig Guttman, un mansevo judio alman, volontario en el opital de aksidentes, rankontro un hazino ke se aviya rompido la espalda. Los doktores no teniyan remedios para kurarlo, i lo desharon a la muerte. Guttman nunka no se puido olvidar de este mansevo. Esta memoria troko la istoria.

Ludwıg Guttman - fondador de los djugos paraolımpıkos

Anyos duspues, Guttman se izo doktor, i se espesializo enriva la kolon vertebral..En la segunda gerra mondial, Guttman se fuyo a la Angletera kon su famıya. Kon tiempo, fondo una kompetision para los diskapasitados, i ansi, Ludwig Guttman fue el padre de los djugos paraolimpikos.

Este anyo, los djugos paraolimpikos estan tomando lugar en Londra, i vana kontinuar del 29 de Ogusto, fin el 9 de Septembre. Mas de kuatro mil atletes partisiparon a los djugos de este anyo. Una de las maskotas olimpikas, se yama Mandeville. Stroke Mandeville es el nombre del opital en el norte de Londra, ande Guttman aviya fondado una unidad para los envalidos de la segunda gerra mondial.

Este mez, la televizyon BBC aparejo un dokumento sovre Guttman, i el muzeo judio de Londra esta metiendo una ekspozision sovre su lavoro, fotografias i dokumentos del opital Stroke Mandeville, los primeros djugos paraolimpikos, i rekuerdos de los djugos.

El direktor del muzeo esta diziendo ke ay una grande ironia - Hitler kijo matar a todos los djudios, i los diskapasitados, dunko Guttman fondo una unidad en el opital Stroke Mandeville, para sanarlos.

En el anyo 1933, antes ke se fuyga a la Angletera, Guttman estava lavorando komo nerochirurjiano en el opital Breslau. Ma, en el anyo 1939, lo transferaron al opital judio lokal, porke los nazis aviyan metido una ley, ke los doktores judios ne pueden lavorar en otros opitales.

En la noche de Kristallnacht, Guttman aksepto sesenta personas al opital, afirmando ke son hazinos. Ma, kuando el Gestapo se apersivio, el Konsey de Asistensia de los Refujiados Akademikos lo fuyo a la Angletera kon su mujer i sus dos ijos.

En la Angletera, en la sivdad de la Universidad Oxford, el governo obzervo un artikolo ke Guttman aviya eskrito sovre los diskapasitados. Komo los inglezes estavan asperando munchos veteranos ke ivan a tornar de la gerra, se desidaron de avrir una unidad espesial por la kolon vertebral en el opital Stroke Mandeville.

Ludwig Guttman se okupo tambien de la salud mental de estos hazinos. Guttman penso ke para ke estos hazinos se agan bueno, kale ke keran bivir, i para kerer bivir, kale tener un butto en la vida.

Esta idea lo izo empesar los djugos paraolimpikos. Los primeros djugos empeso en Londra, en el anyo 1948. En el opital Stroke Mandeville, Guttman organizo una kompetision por diziocho hazinos. Esta kompetision se repeto kada anyo. En el anyo 1952, los djugos se izieron enternasional, i en el anyo 1960, los paraolimpikos empesaron a azersen en el mezmo lugar de los olimpikos.

En el anyo 1980, Guttaman muryo de una ataka de korason. En el anyo 1974, el vizito la Almania ande le dieron el nombre a una kaye.

Segun el direktor del muzeo judio de Londra, Guttman lavoro no solo para ayudar a estas personas ke un tiempo los doktores las deshavan a murir, ma el peno tambien para mejorar sus vidas.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın