Rekuerdos de Pesah

Rekuerdos de Pesah

En dos tres diyas, vamos a selebrar la fiesta de Pesah kon muestras famiyas. La primera i la segunda noche de Pesah, todos los keridos vamos a estar aunados en una kaza. En kada kaza, ya se merko la arina, la matza, los guevos i las muezes para azer buirmelikos, gato de Pesah, i teshpishti.

Del empesisho de esta semana, las mujeres judias ya se metieron a gizar, i aparejar por la noche de mued. Oy, estos aparejos ya mos empeso a vinir difisil. Mezmo ke kada anyo se estan amiguando mas, por la kontinuasion de muestros kostumbres, i por pueder transmeter muestras tradisiones a muestros ijos, kada mujer judia esta kontinuando a azer lo ke vido de su madre.

Las fiestas de sukuenta anyos antes, eran muy diferentes de las de oy. Akeyos anyos, los judios de Estanbol moravan en las mesmas partes de la sivdad. Lo mas de los judios moravan en Kuledibi. Los judios de la parte de Anatolia, moravan en Yeldegirmeni, Kadikoy. Akeyos diyas, muestras nonas no se sintiyan el menester de ambezarsen el turko, porke mezmo los vendedores eran judios.

Kuando aviya una fiesta judia, ya se sintiya de ke salitesh a la kaye. Los parientes moravan serka. Todos biviyan la fiesta endjuntos: las famiyas, los vizinos, los vendedores. Kada fiesta teniya su rituel. Era emposivle de no azer estos ritueles, porke si mankates de azer una koza, todos lo remarkavan.

Oy, mos estamos keshando de los aparejos de Pesah, i estamos diziendo ‘La tenemos esta fiesta un poko pezgadika’. Kualo ke dizieran las mujeres de antes? Kada Pesah, se lavava los perdes, los naperones, i se davan a la kola. La kuzina se vazyava entera, los almaryos se alimpiavan bueno, i los papeles de los almaryos i de los kashones se trokavan de muevo. Todas las kalderas se fregavan kon el tel de aliminuim, i kon arap sabunu. Los chinis, las kupas, todo se lavava a la mano. No kaliya ke kede ni una miga de pan. Mi nona mos kontava ke anyos antes, antes de Pesah, a media noche saliyan a bushkar si kedo en un kanton una miga de pan.

Duspues ke estas limpyezas pezgadas eskaparon, las mujeres judias se metian a empleyar, i a gizar. El masapan, el dulse blanko lo aziyan en kaza. Los gatos de Pesah, el tezpishti, los guevos kochos, los birmuelikos, las fritadas de espinaka, las albondigas de pırasa, las dolmas de tomat, de pipirushka i de kalavasa, los rulikos de espinaka i de berendjena, el kodrero, las patatas al orno.  No saviyan lo ke era kolesterol u trigliserit. Las mujeres lavoravan muy duro para pueder resivir los komplimentos de sus maridos, noche de Pesah.

Lo mas, los grandes de las famiyas resiviyan sus ijos, sus ermanos, noche de Pesah. De munchas semanas antes kaliya ke se aranjavan ande se vana fiestar las dos noches de Pesah. Nonos, nonas, madres, padres, ijos, ermanos, inyetos, sovrinos, primos, todos se arekojiyan en la mezma kaza. Ya vos puedesh imajinar la djentorya i el bruyido. Ma kuando se meldava la Agada, no kaliya kitar ni un pi de la boka, sino muestro nono mos mirava del yan.

Noche de Pesah, todos viniyan kon buketos de rozas, u kon un kuti de masapan. Asperavamos ke los ombres tornen de la Sinagoga. Los mansevos no puediyan dizir ‘Esta noche no me kero ir a la Sinagoga’. Duspues ke todos los ombres vinieron, todos se asentavan al Seder, para dizir la Agada. Todos endjuntos diziyamos la Agada, porke todos ya la saviyamos de kavesa. Kada dos puntoera ‘Se lavaran las manos…’, El legen i el djarro ya estavan pronto. ‘Dan, kinin, sefardan, kinim, arov’. ‘İjikos, no miresh por aya’. İ mozotros, los ijikos, miravamos kon kuriozita del yan, para ver kualo estan echando del djarro aryento del legen. Yo me akodro ke mi nono metiya unas kuantas matzas ariento de una tovaja, lo aziya komo un sako,  me lo dava ke me lo meta al ombro, i me diziya ‘Metete esto al ombro, te vas mas presto a Yerushalaim’.

De muestra chikes, ya konosiyamos la sinyifikasion de Pesah, ke es ‘la salidura de Misraim’, la endependensia del puevlo judio. Kada anyo, selebramos este evento, ke paso miles de anyos antes. Komo meldamos en la Agada ‘En kada jenerasion, kada judio es ovligado de repetar lo mezmo, komo si fuera ke es el, el ke salyo de Misraim’.

Kada anyo, komemos el pan ke no tuvo el tiempo de levdar, el harose, i las yervas amargas untandolas al vinagre, por akodrarmos de la amargura de muestros ansestros. Allado del kobran Pesah, metemos un guevo kocho ke semboliza la fekondasion, i la esperansa. Los kuatro vazos de vino sembolizan la liberdad. Komemos la matza, la lechuga, kontando a los chikos las maraviyas ke izo el Dio, para kitarmos de Misraim.

Anyos antes, duspues de la Agada, i de la komida de Pesah, kon grande alegriya kantavamos las kantikas de Pesah, todos endjuntos: ‘El Kavretiko’, i ‘Kualo es el Uno’.

Estos rekuerdos de muestra chikes, vana kedar en muestros ojos. Oy, mezmo ke lo estomos aziendo kon muncho mas livianes, i kon la ayuda de la teknolojiya, muestra erensya rika va kontinuar a pasar a muestros ijos, i a las jenerasiones vinideras.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın