Devarim

Rav Yeuda ADONİ Köşe Yazısı
25 Temmuz 2012 Çarşamba

Ansi enspesa la peraşa “Devarim”. Ke es el enpesijo de el sinken livro de la Tora. Estas son las palavras ke avlo Moşe a el puevlo de Israel. Son palavras de kastigeryo. Moşe Rabenu en sus diyas de alkavo, kastigo a el puevlo cudyo, en la yanura de el Yarden. El les izo akodrar lo yerros ke izyeron entervalo de kuarenta anyos en el dizyerto. Los diyas ke vinyeron kontra el Kriyador. Ke dişeron, mijor era de murir en Mistrayim, ke de vinir a este dizyerto. Ke sirvyeron el  idolo de Peor. Ke diseron a Moşe Rabenu no ay simiteryos en Misrayim. Ke nos truşites por murir en el dizyerto, voz keşateş por la magna ke vos dyo el Kriyador por mantenervos, izites el bezero de oro. Les aze akodrar Moşe Rabenu el yerro ke izyeron los eskulkadores de avlar mal por la tyera prometida. Moşe Rabenu todos estos kastigeryos los izo a el puevlo cudyo sekretamente. No los kijo azer averguensarios, de la estima ke teniya verso el puevlo Cudyo. Ma despues vemos ke Moşe Rabenu klaramente les aze akodrar los yerros ke izyeron el puevlo entervalo de los kuarente anyos ke estuvyeron en en el dizyerto. Dizen nuestros savyos la persona ke aksepta i desha a su pekado, este pekado se le aze merito. Moşe Rabenu ke konosiya muy bien a su puevlo, ya entendyo, ke el puevlo akseptaron sus yerros dunke no aviya ningun danyo de akodrarselos klaramente ke todos los yerros se izyeron meritos. Moşe Rabenu ekspliko la Tora entera a el puevlo Cudyo malgrado ke ya avian sintido en el Monte de Sinay. Moşe Rabenu tuvo de menester de repetarla, a los ke nasyeron en el dizyerto, a la jenerasyon nueva no aviyan sintido en el Monte de Sinay de boka de el Kriyador. Si no ke eyos sintyeron todos estos evenementos de boka de sus jenitores. Malgrado, ke la jenerasyon nueva teniya una grande fey i kreyensa Moşe Rabenu tuvo el menester de eksplikarles el mismo.

Moşe Rabenu disho a el puevlo Cudyo. El Kriyador enkomendo i disho, basta agora ke estuvitesh lado el Monte de Sinay. Ya afirmatesh munchas enkomendansas,ya resivitesh la Tora, ya fraguatesh el Tabernaklo, ya formatesh el sanedrin el Tribunal. Agora kamina a delantre. Agora vos se esta avriyendo el kamino de la tyera prometida.

Moşe Rabenu eskojo i tomo el biervo Devarim por el enpesijo de la perasha, mismo biervo devorim la sinyifikasyon es bizbas, komo las bizbas nos dan miel ke es dulse, i la Tora nos adulsa a nozotros i es vidas para nozotros, komo es dicho “arvol de vida es a la ke le sostyenen i todos ke sostyenen a la ley son orozos.