SOHRAB AHMARI, un jurnalisto Irani-Amerikano en el estado Judyo

‘A kuala komunidad judiya apartienes?’ me demando el ofisye de seguridad de El-Al, en el aeroporto de Boston.

‘A dinguna komunidad’ le respondi. El ofisye echo un ojo a mi pasaporto amerikano ande İran esta eskrito en el lugar de nasimiento.

‘Ma, ay una Sinagoga ke te vas de vez en kuando, no?’

‘No, yo no so judyo’

‘Bueno, aspera aki’.

El ofisye se alesho de mi lado, i empeso a avlar kon un otro ofisye: ‘Un omre de orijin del pais ke esta inyegando el Holokosto, penando para entrar al estado judyo!!!’

Los dos ofisyes se aserkaron de mi, i la enterogasion kontinuo. Bueno ke estava viyajando komo parte de la delegasion de la Komite Judiya Amerikana.

La boka seka, la boz tremblando, el korason batiendo, me suvi al avion. Duspues de viajar tantos anyos kon un pasaporto irani, reushi a obtener un pasaporto amerikano. Viajar komo un amerikano, para mi, fue uno de los mijores aspektos de mi vida.

En el aeroporto Ben Gurion, surplus, una otra enterogasion de vente puntos…Si dizish ke la seguridad de El-Al es dura, aprova a entrar a Tehran kon un pasaporto Israeliano!!!

En las kayes de Tel Aviv, el atmosfer kayente del pais de la Mediteranea, me izo olvidar el stres ke pasi.

Esto en Tel Aviv, la una de las dos mas grandes sivdades de İsrael, kon sus edifisios blankos del stilo Bauhaus, sus plajes, i la vida de noche. Siempre fui kuriozo de viajar en Tel Aviv.

De una parte, la amenaza (tehdit) de las armas nukleeras de mi pais natal: de otra parte, las problemas del pais (los ultra ortodokses ke no keren lavorar, ni irsen a la armada): los masakres en Siria, la kriza en Sinai….ma, los restoranes, los bares, el entretenimiento en Tel Aviv esta efasando esto todo de la kavesa.

‘Keremos olvidarmos estas problemas’ esta diziendo un israeliano ke rankontri en un bar. A los israelianos, kuando les estava diziendo ke so irani, las karas se les estava trokando, les estava viniendo a los ojos ‘los mullas iranis kon las armas nukleeras’, i se estavan aleshando de mi lado.

Era el tiempo de la fiesta de Purim. Por los mansevos israelianos, Purim es komo Halloween: una okazion de vistirsen de una manera ekstraordinaria, i de bever sin grado.

Un amigo me disho ke devo de merkarme un kostum, para vistirlo en Purim. Pensi de vistirme komo ‘Ayetullah’, ma duspues troki de idea, i me merki un kotsum de un ‘Seksi Mohel’.

Rankontri un jurnalisto ke konosiya de antes en Molly Bloom, un pub irlandes en Tel Aviv. El efekto de las biras ke bevimos, mos izo enduna poetikos, i empesimos a avlar de las posibilidades de una pas entre İran i İsrael. ‘Lehaim a la Pas!’ disho mi amigo, i de muevo alevantimos los vazos de bira.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın