Komemorasion del Masakro de Munih 1972

Komo todos lo savemos, el masakro de Munih 1972, fue una ataka terorısta kontra los atletes israelianos durante los djugos olimpikos de 1972. Mueve miembros del ekipo Israeliano fueron matados por los teroristos palestinianos.

Komemorasion del Masakro de Munih 1972

Munih 1972 fue el primer olimpiat selebrado en Almanya duspues del anyo 1936, kuando los nazis aviyan selebrado los djugos olimpikos. Por esta razon, la tansion de los atletes estava alta en Munih 1972. Los atletes israelianos, i sus antrenores estavan inyervozos. Munchos entre eyos, tenian parientes ke fueron asasinados en el Holokosto. Mezmo, unos kuantos entre eyos, eran sorviventes del Holokosto. La ataka terorista de Munih 1972, fue una koensidensia terivle por el ekipo israeliano.

Este anyo, es el kuarenten anyo del masakro de Munih1972. Malorozamente, durante kuarenta anyos, en kada olimpiat, los dirijentes del komite olimpiko enternasional, refuzaron de komemorar este terivle evento. Ademas, en la seremonia komemorativa del sesh septembre 1972, el prezidente del komite olimpiko disho la famoza fraz LOS DJUGOS DEVEN DE KONTİNUAR.

Ma, al pareser, el presipo LA POLİTİKA NO DEVE DE ENTRAR A LOS DJUGOS, no fue aplikado en los djugos olimpikos de invierno del anyo 2002. En Salt Lake City 2002, en la seremonia de aviertura del olimpiat de invieno, uvo munchas referensias a la katastrof del ONZE SEPTEMBRE. Ande esta ke la politika no deve de entrar a los djugos.

No solo esto. En el olimpiat de Vancouver, el komite olimpiko komemoro el atlet gregorian ke muryo en el olimpiat presedante, i en la seremonia de aviertura, uvo un minuto de silensio por onorar su memoria.

Por kuarenta anyos, no uvo dingun akto de komemorasion por onorar la memoria de los mueve atletes israelianos asasinados en el masakro de Munih 1972. La komite olimpika enternasional no se dio mezmo la pena de eskrivir una repuesta a las letras demandando un akto de komemorasion. Ma, las famiyas de las viktimas no se enfasiaron de eskrivir letras demandando un rekonosimiento ofisial por los mueve atletes israelianos.

En los mezes ke pasimos, estas demandas pujaron de dia en dia. Munchos lideres i governos ensistieron por un minuto de silensio en los djugos olimpikos de London 2012. Mas de 100.000 personas afirmaron petisiones, demandando un rekonosimiento ofisial.

La komite olimpika israeliana estava muy mirikioza si una komemorasion se iva realizar en la seremonia de aviertura del olimpiat de este anyo. Ma, malorozamente, komo kada vez, no uvo dingun akto para onorar la memoria de las onze viktimas israelianas del Munih 1972. Verguensa por el komporto anti israeliano de la komite olimpika enternasional. I mas grande verguensa por el sembol de fraternita ke los djugos olimpikos reprezentan.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın