Los diez paizes ande los rezidentes se sienten orozos

Los diez paizes ande los rezidentes se sienten orozos

La prosperidad ekonomika, la salud, i el suporto sosyal son los mas emportantes faktores ke kontribuen al standard de vida de la persona. OCDE (Organisation for Economic Cooperation and Development) izo una investigasion para determinar en kualos paizes las personas se sienten orozos.

OCDE mezuro mas de trenta datas en onze diferentes kategorias, unos kuantos siendo el revenido, la edukasion, la salud, el empleyo, el suporto sosyal etc. Demandaron a kada rezidente de numerar de uno a diez los mas fuertes faktores ke son neseserio para ser orozo. Segun los rezultados de estos faktores, diez paizes ande los rezidentes se sienten orozos fueron numerados. Estos paizes son Danimarka, Norvejia, Holanda, Suiza, Austria, İsrael, Finlandya, Kanada, Suisa.

Entre estos faktores, la prosperidad ekonomika salyo el mas emportante faktor por la satisfaksion de vida de la persona. De estos diez paizes, los rezidentes de los mueve, tienen mas alta prosperidad  ekonomika ke del averaj de OCDE. Segun el rezultado, el revenido i el standard de vida de la persona es el mas emportante faktor por ser orozo. Ademas, la ekonomika rejional de estos paizes son muncho mas atlas, komparando a los otros paizes. Las devdas de los governos son muy pokas, o bien los governos tienen un surplus.

 El empleyo, tambien, es uno de los faktores evidentes por la satisfaksion de vida. Segun Matthias Rumpf, el direktor de los medios de komunikasion de OCDE, los ke no tienen stabilidad de empleyo no pueden ser orozos, i si la persona ke no puido topar un empleyo por un largo tiempo, no puede tener del todo satisfaksion de bivir.

Segun los rezultados de esta investigasion, duspues de la stabilidad ekonomika viene la salud. Los paizes ande los sektores de salud son muy developados, los rezidentes no tienen problemas de salud.

Duspues de la salud, el kuatren faktor es el suporto sosyal. Los rezidentes ke tienen buenos amigos, o bien parientes de serka ke se okupan de eyos, kuando tienen menester, se sienten mas orozos porke pensan ke estan en seguridad.

‘Tener sufizante tiempo libro para repozar’ salyo el sinken faktor por ser orozo. La persona tiene menester de tener libro tiempo por repozar, por sus hobis, i por viajar. Esto efekta la salud mental de la persona.

Entre estos diez paizes ande las personas tienen satisfaksion de bivir, İsrael esta viniendo el sejen. Los ochenta i uno por sien de los israelianos no tienen problemas de salud. Mezmo ke el paiz tiene problemas de seguridad, la proporsion de asasinto esta muncho mas abasho ke del averaj de OCDE. Los setenta por sien de los israelianos se sienten en seguridad, en kaminando en las kayes de noche. Los ochenta por sien de los rezidentes no tienen problemas de empleyo. Mezmo ke los israelianos lavoran munchas oras (lo mas manko suekenta oras en una semana), segun eyos, ya tienen sufizante tiempo para repozar, entretenarsen, i viajar.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın