El mas korajozo i el mas reushido kuplo, Beate i Serge Klarsfeld son de orijines muy diferentes, para pueder formar una aliansa ke puido yevar a la djustisia los prensipales kriminales de gerra, los Nazis, entre eyos siendo el Karniero de Lyon. Klaus Barbie es responsavle de las torturas ke izo a los İjos de İzieu, i de las deportasions de miles de judios.
Nasida en una famiya Protestan de Berlin, en el anyo 1939, Beate era la ija de un pilot, ke gerreyo por el Treser Reich, en la gerra. Komo se engrandesio duspues de la gerra, Beate no saviya kaje nada sovre el Holokosto, fin ke emigro a Paris, i se konosyo kon Serge, en el anyo 1961. Beate empeso a entender las kozas negras ke fueron echas en su proprio pais. Munchas vezes, Beate disho a la presa, ke todo lo ke izo eya por ke los Nazis seygan apanyados, es el prodakto de su inyervo de ser una almana.
Serge Klarsfeld es un judio ke vido el Holokosto. Kuando el Gestapo vino a deportar a su famiya, su padre los eskondio ariento de un almaryo detras de la pared. El Gestapo lo yevo a su padre, i duspues de esta data, Serge no lo vido mas. Anyos duspues, Serge se ambezo ke su padre muryo en Auschwitz.
Duspues ke se ambezo la muerte de su padre, esta pedrida amarga lo izo empesar a lavorar para dokumantar kada judio fransez ke muryo en las manos de los Nazis.
La pedrida de su padre lo izo realizar ke los Nazis, mezmo ke izieron tantas negreguras, dainda estavan kontinuando a bivir una vida ermoza i respektavle en la sosiedad almana, kon altas karieras. Serge no puido suportar esta endjustisia. Kuando el Nazi propagandisto, Kurt Kiesinger se izo el primer ministro de Almania, Beate empeso a arekojer las negras aktividades ke Kiesinger izo en el Holokosto, i los prezento a la presa franseza i almana. En el anyo 1968, Beate reusho a aserkarse de Kiesinger entre tanta djente, i se lo disho en la kara todas las negreguras ke el izo en los anyos del Holokosto. Esto fue un grande skandal en toda la Evropa, i mezmo oy, esto esta eskrito en los livros ke los elevos estan meldando en las eskolas de Almania.
Por modo de este komporto, Beate entro en prezo. Ma Serge no se estuvo kayado, lavoro muncho, i reusho a trayer a Kiesinger delantre la djustisia.
El anyo suivante, Beate lavoro por una kampanya kontra Kiesinger, i le ayudo a Willy Brandt a ganar el posto de primer ministro.
La gerra de Beate i Serge Klarsfeld kontra los Nazis fue difisil i danjeroza. Lavoraron muncho, empleyaron todo modo de kaminos, kaminos legales i illegales, para pueder azer apanyar los ex-Nazis. Beate i Serge, unas kuantas vezes entraron en prezo, sufrieron amenazas, ma nada no los puido aretar de sus kamino.
Oy, el partido siedra de Almania, esta nominando Beate Klarsfeld komo su kandidata en las eleksiones prezidantales, del mez adelantre. Beate ya save ke eya no tiene dinguna shans para pueder pasar el otro kandidato Joachaim Gauck en las eleksiones, ma eya ekspreso a la presa su grande satisfaksion, ke mezmo tenyendo pro-İsrael ideas, eya puido ganar el respekto del partido de la siedra.
