El problema de los Ultra-Ortodoksos

El problema de los Ultra-Ortodoksos

El profesor de pediatria Channa Maayen, gano un premio por su livro sovre las hazinuras herediterias de los judios.

El Ministro de Salud ke es un ultra-ortodoks, devia de prezantar este premio a Prof. Maayen en una seremonia. Las personas ke asistieron a la seremonia eran todas personas relijiozas. Komo Prof. Maayen ya estava al koriente de esto, akel diya se vistio una bluza kon mangas largas, i una fusta larga. Komo era defendido ke mujeres i ombres se asenten endjuntos, Dr. Maayen no puido asentarse al lado de su marido. Antes ke la seremonia empese le disheron ke uno de sus amigos de eskola iva tomar el premio en su lugar, porke mujeres no pueden suvir a la sena.

Dr. Maayen se enkonto muncho de oyer esto, ma prefero de estarse kayada porke esto era una seremonia del governo. Ma, muncha djente se revoltaron a este komporto feyo. Este evento, i munchos otros asemejantes fue el empesijo de la gerra kontra los ultra-ortodoksos. El komporto feyo kontra las mujeres fue la kavza de la kriza kontra los ultra-ortodoksos en İseael.

La lista de los eventos kontra las mujeres esta pujando de diya en diya. La semana ke pasimos, los organizadores de una konferesia sovre la salud de la mujer i la ley judia, anularon las lekturas de ocho mujeres porke mujeres no son permetidas de salir a la sena. Otro skandal afito kuando ultro-ortodoks ombres eskupieron en la kara de una ijika de ocho anyos porke su fostan estava avierto. Mezmo en la armada estan kitando problemas. El Grande Rabino de la Fuersa Aerea demisiono porke los soldados relijiozos no fueron permetidos de salir de una kamareta ande una kantadera estava kantando. En Yerushalaim, apegaron posteres de la Polizia en la forma de Hitler, porke en los otobuses ke pasan de los karteles de los ultra-ortodoksos,dainda estan permetiendo a los ombres i mujeres ke se asenten lado kon lado.

Estos diyas, el biervo ‘hadarat nashim’ (la ekskluzion de las mujeres), esta en todas las partes de İstael. Muncha djente vana pensar ke esto no es normal en un pais ande sinko mujeres se izieron prestijiozas pilotas de la Fuersa Aerea, i una mujer se izo Prezidente de la Korte Suprema de Justisia.

De ke esta disputa empeso, las partes empesaron una kampanya publika vigoroza. El ‘New İsrael Fund’ ke defende la egalidad i la demokrasia, esta apegando en las paredes posteres de mujeres kon el slogan ‘Devemos de ver i oyer a las mujeres’. La semana ke pasimos, la Asosiasion Medika de İsrael, afirmo ke sus miembros deven de boykotar los eventos ke no permeten a las mujeres de avlar en la sena.

Las otoridades relijiozas estan pretendiendo ke los grupos liberales estan avriendo gerra kontra un sektor de la piadoza ke la sola koza  ke kere es bivir en pas.

El sektor de los ultra-ortodoksos es konosido en İsrael komo ‘Haredim, (los ke tremblan delantre del Dio). Entre eyos, ay los hasidim de orijin evropeeno, i los presedentes de los paizes del Oriente Medio. Este grupo esta reprezantado en la politika por el partido Shas. Este puevlo konsidra el Estado de İsrael ensufizamante relijiozo en su fondasion, porke dainda Mashiah no vino. Los Haredim ke son mas de un milion en İsrael, preferan de kedar afuera de la politika de gerra i pas, son objektivos en la kestion de palestina, i solo se okupan de las nesesidades nateriales i espirituales de sus miembros. En la politika, son de la parte derecha.

‘Oy no kedo dinguna sivdad ke no tenga un komunidad haredi’ esta diziendo el haredi rabi, Rabbi Abraham İsrael Gellis, ‘yo tengo trenta i ocho inyetos, i kada uno bive en diferentes partes del pais’.

Este grupo tiene poder ekonomika, ma lo ke le manka es prodaktividad ekonomika. Por eyos, el estudio de la Tora viene antes de todo, i azen sus posibles porke sus ombres estudien la Tora en lugar de lavorar. Las mujeres lavoran. Los sesenta por sien de los ombres no tienen lavoros, i no se van a la armada. Kada famiya tiene mas de sesh kreaturas.

Komo la razon ke tienen, munchos israelianos estan revoltando kontra la situasion de los Haredim. Keren ke i eyos partisipen a la sosiedad moderna en lavorando, i en indosen a la armada.

Las kreaturas de los Haredim se van a las eskolas de los ultra-ortodoksos, i el sistema de edukasion de estas eskolas no akorda del todo kon la edukasion del 21. siglo.  Estas eskolas no les dan a las kreaturas artifisios para pueder lavorar en la sosiedad moderna.

En los anyos dalkavo, ya empeso a aver trokamientos en los Haredim. Miles de Haredi ombres se estan ambezando ofisios, estan topando echos, i una chika partida se estan indo a la armada. ‘Kale ganar paras’ esta diziendo un reformisto Haredi, ‘tenemos un milion de miembros, i por esto tenemos un milion de problemas’.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın