La fıesta Tu-Bıshvat en la Sınagoga Hemdat Israel de Kadıkoy

Dora NİYEGO Judeo-Espanyol
8 Şubat 2012 Çarşamba

Diya de Alhad, la fiesta Tu-Bishvat se selebro en la Sinagoga Hemdat İsrael de Kadiköy, kon la partisipasion del Grande Rabino Rav. İsak Haleva, i el Konsul de İsrael, Moshe Kamhi.

El Prezidente de muestra komunidad, Sami Herman, los dirijentes de la komunidad, los prezidentes de las enstitusiones i las asosiasiones, i munchos miembros de muestra komunidad asistieron a esta selebrasion.

La selebrasion empeso kon el deskorso del Prezidente de la Administrasion de las Sinagogas de Kadikoy, Mayir Saranga. Saranga remersio los envitados prezentes por sus partisipasion a la selebrasion, i avlo sovre la sinyifikasion de esta fiesta. Mas duspues, mos avlo sovre los developamientos en la Komunidad de Kadikoy. Saranga mos konto las aktividades de la Maestra Miniks, i la edukasion moderna ke se esta dando a las kreaturas: ‘Aparte de esto, kon la partisipasion de las kreaturas de la Maestra Miniks, selebrimos la fiesta de Hanuka, izimos munchas aktividades en la Asosiasion Goztepe Kultur, i dimos seudas en la Sinagoga Bet-El de Caddebostan’ disho Saranga.

Los mansevos del Talmud Tora de la Sinagoga Bet-El de Caddebostan, mos kantaron kantikas de Tu-Bishvat, i meldaron pasajes del Teillim ke sinyifikan la emportansa de esta fiesta.

Los chikitikos de la Maestra Miniks kantaron kantikas en turko i en ebreo, i izieron bayles maraviozos.

El Prezidente de Talmud Tora, İzak Babat, empeso su deskorso kon siertas kestiones ke mos izo pensar sovre la edukasion ke estomos dando a muestras kreaturas: ‘Djusto komo los arvoles, es ke ya esto puiediendo ser abrigo a mis kreaturas? Ya esto puediendo developarme, i reushir a azer mi dover i mis responsabilitades? Ya esto puediendo prokurar la kontinuasion de mi famiya judiya? Ya me esto abokando delantre del Dio?’ 

En su deskorso, Babat kijo azermos pensar sovre la emportansa de la edukasion de las kreaturas: ‘La edukasion es una kontinuasion. Anyos duspues, arekojes lo ke ensembrates oy’.

Mas duspues, Babat mos disho ke embiyaron los mansevos de Talmud Tora a İsrael, para ke tomen la edukasion de los ekspertos de este ramo: ‘Los elevos de Talmud Tora estan pujando de dia en dia. Muestro dover es sostener estos mansevos’ disho Babat.

El filantropisto Albert Levi, mos avlo de su koneksion kon esta Sinagoga, i mos amostro la siya de su nono, ke siempre la deshan vaziya, por respekto a el. Albert Levi remersio el prezidente i los miembros de la Administrasion de Kadikoy, por sus esfuersos.

Rav Leon Adoni mos ekspliko la sinyifikasion de Tu-Bishvat. Mos konto ke la fiesta Tu-Bishvat se empeso a selebrar en esta Sinagoga en el anyo 1942, kuando el Rabi David Eshkenazi vino de Bulgaria, a bivir en Kadikoy. ‘La tierra ata una persona a un lugar, por esta razon, ensembramos arvoles. Djusto komo los arvoles fuertes, dinguna tempesta puede destruir la persona ke kamina en el kamino de la Tora’ disho Rav Adoni. ‘Ken i ken vaja salir de Ejipto?’ le demandaron a Moshe Rabeno. ‘Vamos a salir kon muestras mujeres, i kon muestras kreaturas’ les respondio Rabeno. Las kreaturas son la kontinuasion de una nasion’.

El Prezidente de las Enstitusiones i de las Asisiasiones, David Elhadef, mos avlo sovre la emportansa de la fiesta Tu-Bishvat, i remersio los dirijentes de esta Sinagoga por reushir a reunar los miembros de muestra komunidad en esta Sinagoga.

La selebrasion kontinuo kon una ovra de teatro prezantada por los mansevos de Talmud Tora. Los mansevos mos transferaron el mesaje de Tu-Bishvat, en transformandosen kada uno en una fruta diferente.

El Grande Rabino Rav İsak Haleva mos avlo sovre la sinyifikasion de Tu-Bishvat. ‘La fiesta Tu-Bishvat mos akorda de remersiar al Dio por los benefitos ke mos dio’ disho Rav Haleva. ‘No egziste dinguna orasion por el espanto del Dio. Si keres bien a las personas, i a la natura, el Dio te amostra el kamino derecho’ kontinuo Rav Haleva. ‘Ay siertos momentos, kuando los sielos se avren en el etaj del Dio, i si dizes ermozos biervos en estos momentos, el Dio te oye. Si keremos bien a las personas, i si vemos solo las partes buenas de las personas, el Dio tambien mos kere bien’.

Ala fin de la selebrasion, se avio el Ehal Akodesh, i todos los asistientes disheron endjuntos la orasion Anoten, kon grande emosion. En saliendo de la Sinagoga, todos se dirijaron a la guerta para ensembrar un arvole, komo se aze kada anyo.

Rogaremos al Dio, ke mos de repozo, para pueder selebrar todas las fiestas, kon grande alegriya.