Las razones del asierto de los judios en el Nobel

Las razones del asierto de los judios en el Nobel

Este anyo, los sientifikos ke resivieron los Premios de Nobel de la fizika, de la chimika, i de la medisina son de orijen judio. Por la primera vez en la istoria, los judios resivieron tantos premios en el mezmo anyo.

 Asta oy, los judios resivieron munchos Premios de Nobel en diferentes ramos. Kada anyo, nombres judios aparesen en las listas de los premios. Es muy sorpredente de ver este asierto de los judios ke suman ‘uno por mil’ de la populasion mondial.

Miles de anyos, los judios sufrieron en la diaspora. Miliones de judios fueron matados en kada siglo. Komo puede ser ke este puevlo esta kontinuando a ser los primeros en la siensia?

Miles de anyos antes, en el Talmud, los rabinos fueron diskutando diferentes ideas, kestionando kada idea, i bushkando repuestas a kada kestion. La kultura i la relijion judia es bazada enriva de ‘kestionar’. El ke kestiona, i bushka repuestas, es muy natural ke va azer muevos deskuvrimientos.

Los judios, komo bivieron en la diaspora por miles de anyos, tuvieron menester de dar grande emportansa a la edukasion, i al estudio, para pueder sorvivir, i adelantar. En una anekdot ke meldi, la madre judia esta diziendo a su ijo ke el kale ke lavore dopyo de los otros para pueder adelantar.

El dezeyo de entender i de eksplorar el mundo, es tambien una espesialidad del judio. Este dezeyo, esta kuriosidad, lo aze orientar al estudio, a la edukasion, i a las karieras enriva de la eksplorasion.

En rezumen, la emportansa ke la kultura judia da a la edukasion, los dirija a lavorar, a estudiar, a eksplorar mas muncho, i a su vez, esto aze ke una grande proporsion de los Premios de Nobel seygan ganados por los judios.

 Albert Einstein, el suksedor de Newton Galileo i Kopernik, es el mas grande nombre de la siensia moderna. Einstein es un grande orgolio por los judios. Los Nazis dezestimieron ‘la teoria de la relatividad’ porke es un deskuvrimiento judio, i ansi una grande jenerasion de sientifikos almanes abandoran la Alemania.

 En la literatura i en la pas tambien, los judios fueron siempre entre los ganadores de Nobel. Los eskrideros judios onorados fin oy, fueron S.Y.Agnon, Nelly Sachs, Saul Bellow, Isaac Bashevis Singer, Joseph Brodsky i Nadine Gordimer. Los onorados ke ganaron los premios de Nobel de la Pas, fueron Henry Kissenger, Menachem Begin, Elie Wiesel, Yitzhak Rabin, i Shimon Peres.

 Kualsiker seyga la razon, ‘el lavoro duro’ i ‘el dezeyo de ambezar i de adelantar’ de los judios los aze progresar. Sus progresos i sus asiertos va kontinuar a ser muestro orgolio.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın