Rosh Ashana en los dıyas del Holokosto

Esta semana en el periodiko Jerusalem Post, aviya la estoria de Naftali Stern, un sorvivente del Holokosto

Tres mezes antes de su muerte, Naftali Stern vijito Yad Vashem kon uno sako yeno de ojas arazgadas. En estas ojas, estan eskritas las orasiones de Roshashana.

Naftali Stern biviya en Romania antes del Holokosto. En el anyo 1944, Naftali, su mujer i sus kuatro ijos, fueron deportados a Auschwitz. Su mıjer i sus ijos fueron asasinados en las kamaretas de gaz. Naftali, komo akeyos diyas era un mansevo forsudo de 34 anyos, fue deportado a Wolfsberg, un kampo de lavoros forsados en Alemania.

El diya de Roshashana se estava aserkando. Naftali empeso a pensar komo ivan a pueder azer los servisios de Roshashana. A la fin, topo una solusion. İva vender su rasion de pan para pueder obtener un kreyon i unos kuantos sakos de papel. İ ansina fue. Naftali aranko los sakos de papel, los izo ojas una a uno, i empeso a eskrivir las orasiones de Roshashana enriva de los papeles.

Noche de Roshashana, el enkargado Nazi, los permetio de reunirsen, i de komer endjuntos sus rasiones de pan. Naftali ke era un kantor antes la gerra, distribuo las ojas, una a una, a sus amigos, i ansi, todos endjuntos meldando a boz alta i kon grande antuziazmo, akeya noche  puedieron azer las orasyones del anyo muevo.

Los sorviventes dainda se akodran de este evenemiento komo un momento espesial en la vida del kampo.

Naftali guadro estos papeles en su puerpo, asta su liberasion. Asta el anyo 1978, kada Roshashana, en las orasiones de la fiesta, Naftali estuvo detenyendo estos papeles en la mano derecha, komo un artikolo muy valorozo.

En el anyo 1978, en prezentando estos papeles a Yad Vashem, Naftali Stern disho ke estos dokumentos son muy emportantes por las jenerasiones futuras, para ke veygan komo los judios, mezmo en los diyas terivles del Holokosto, mentenieron la identidad judia, i nunka no peryeron la esperansa.

Kada anyo, para tomar parte en la edukasion del Holokosto, el diya del Holokosto, mas de un milion de sorviventes en el mundo entero, vijitan el Yad Vashem.

En aziendo el tur del Muzeo del Holokosto, todos los vijitantes ven los papeles de Naftali Stern, tambien miles de otros dokumentos, kada uno de estos dokumentos, kontando la propria estoria del viktima, su propria estorya, kon su propria sinyifikasyon espesial.

 Akel diya, kada judio sale de Yad Vashem, espiritualmente riko, i prometiendose de fortaleser la komunidad judia, gerreyar kon el antisemitizmo, i la entolerensia.

Kada diya, Yad Vashem reafirma su prometa a Naftali Stern, i a todos los otros sorviventes, de kompartir sus istorias kon el mundo entero.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın