En un artikolo ke meldi en la revista Le Monde, el eskritor esta kritikando el kondukto de los israelianos.
Un farmasetiko fransez bivyo vente anyos en Fransia, antes de azer aliya a Yerushalaim trenta anyos antes. El enverano pasado, el farmasetiko se fue a vijitar Strasburg, la sivdad ande el nasyo. Un diya ke entro a un magazen, se adreso al posedor del magazen diziendo ‘Kero merkar esto, esto i esto…’. El ombre le dio una konferensia buena, diziendo ke se empleya biervos de korteziya, komo‘Buenos Diyas, Grasias, Adiyos’ en adresandose a una persona. El farmasetiko kedo enkantado, i se rendio kuento ke karar de grosero el se izo.
En Israel, las maestras se estan keshando de los elevos porke los elevos no saludan, no demandan permision para avlar, o para alevantarsen de la siya. ‘No kale enkantarse, los chikos kopyan sus padres i madres’ estan diziendo las maestras.
El eskritor esta diziendo ke, en los magazenes vesh los israelianos gritando, i arondjando la djente para pasar adelantre de la kola. Las mujeres evropeenas ya se auzaron a este modo de kondukta. Antes de entrar al otomobil, los ombres no les avren la puerta, en entrando a un lugar, o salyendo, no las deshan pasar en primero, o en la kaye, kuando un marido avre la puerta del otomobil para su mujer, la djente pasan kon una sonriza ironika.
‘En avlando de los otomobiles, la primera regla en el trafik es ‘No Ay Reglas’ esta diziendo el eskritor. ‘Los israelianos konduizan komo lokos, nunka no empleyan las lambas de sinyal, enduna pasan a la derecha en kortando el kamino de los otros’.
‘Es djusto’ disho un diplomatiko israeliano, ‘Tenemos una reputasion muy negra sovre la korteziya’. La razon de esto es ke, preferamos de mentener muestras relasiones natural i informal’.
El eskritor esta diziendo ke los israelianos son tan informal ke, vienen a tu kaza sin enformarte de antes, entran al salon i a las otras kamaretas sin demandar permision, avren la puerta de tu otomobil, i mezmo te demandan de darles un torno kon el otomobil.
Los israelianos akseptan la korteziya komo ıpokrizıya. Este kondukto tiene sus raizes en la filozofiya moral del Kibutz. Todos los kibutzes son iguales, los kibutznikes se komparten los echos del kibutz , no asperan dinguna gratifikasion, i dingun kibutznik no es superior al otro.
Ay una famoza pintura en los kibutzes de Israel, burlandose de la korteziya de los judios almanes ke vinyeron a Irael en los anyos 1960’s. La pintura esta amostrando dos judios almanes kavakando la tierra, i ofriendo la pala uno al otro, diziendo ‘Bitte Schon, Danke Schon’ (Por Favor, Grasias).
Ay munchos anyos ke estos kostumbres entraron a la armada, al mundo de komersio, a la vida de kada diya, i enfluensaron la forma de kondukta de los israelianos i sus kreensias.
Segun el eskritor ‘Siempre vale la pena de araskar la superfisıya de los karakteristikos nasionales’. ‘Si un etranjero se keda en Israel un tiempo sufizante, ve ke los israelianos son amistozos, i se ayudan unos a los otros kuando tienen menester.
‘Las personas ke nasieron en Israel las yaman Sabras. Sabra es el nombre de una fruta ke sale de un kaktus. Komo la fruta Sabra, los israelianos son espinozos ma dulses en el enterior’ esta diziendo el eskritor.
