El 23 de Juno, el selebro artisto Peter Falk, konosido kon el rolo de Kolombo, muryo de Alzeimer en Beverly Hills, Los Angeles.

" />

Peryimos a Peter Falk, el selebre Detektive ‘Kolombo’

El 23 de Juno, el selebro artisto Peter Falk, konosido kon el rolo de Kolombo, muryo de Alzeimer en Beverly Hills, Los Angeles.

Peryimos a Peter Falk, el selebre Detektive ‘Kolombo’

Peter Falk nasio en el anyo1927, en New York. Kuando teniya tres anyos, por modo de la diagnosis de kanser, fue operado i le kitaron el ojo derecho.

Falk era el prezidente de su klasa en el lise Ossiming. Su primer rolo fue ‘el rolo de un detektive’, kuando era un estudiente en la eskola sekondarya.

Falk tomo sertifika de kontabilidad, i lavoro en el Bureau de Budjet del Estado Connecticut antes de azerse aktor. Mas duspues, kijo trokar de profesion, i estudio el arte de aktuar.

Su padre era judyo ruso, i su madre era judiya de Polonya. Todos lo konosiyan komo italiano, ma el era un judyo ashkenaz.

Peter Falk se kazo dos vezes, i era padre de dos ijos-Catherine i Jackie.

Peter Falk desho sus estudios, i se izo un kozinero en la Marina. Falk kijo entrar a la Marina ma no lo akseptaron porke teniya solo un ojo. Mas duspues, torno a la universidad, i estudio siensias politikas. Falk kijo lavorar por la CIA, ma no lo akseptaron.

Kuando era chiko,  Falk djugava en la Liga de los Chikos. Un diya, el arbitro lo yamo. Falk, espantandose ke el ojo lo va danyar en djugando, se kito el ojo de vidro, se lo dio al arbitro, i le disho:’Puedes detener esto por mi?’

Mezmo ke Peter Falk djugo en munchos rolos en las seris de televizyon entre los anyos 1960-1970, todos lo konosieron kon el rolo Kolombo, el selebre detektive. Kolombo era un personaje mal vistido i distrado. Segun Peter Falk, Kolombo era un karakter asemejando a Sherlock Holmes. Holmes fumava una pipa, Kolombo fumava sesh puros al diya.

Kada semana, el mundo entero estuvo suivando kon grande plazer el djugo de ‘gato i raton’ ke Kolombo estuvo djugando kon el asasino. Segun el kritiko de televizion, Ben Falk, la idea del personaje Kolombo fue enspirado del inspektor Porfiri Petrovich, del livro ‘Crime and Punishment’ de Dostoievski.

Peter Falk diziya ke el karakter de Kolombo parese muncho a su karakter, siendo obsesivo i perfeksionisto komo el. Munchas kozas en su vida trokaron duspues ke djugo el rolo Kolombo. Kuando se fue a la Afrika, todos lo estuvieron yamando ‘Kolombo’

Kolombo, en vozes, avlava de su mujer, ma su mujer nunka no salyo en medio. La majorita de los echos de la vida privada de Kolombo, estavan en el ayre, i munchas vezes kontradiktorias. La famoza empermeavle ke no se kitava de enriva, esta dianda guadrada komo rekodro del filmo.

Mas duspues, munchos karakteres de karikatura fueron enspirados del personaje Kolombo.

Peter Falk djugo en munchos filmos, i en munchas seris de televizyon, i fue nominado por Oscar i Emmy, en los anyos 1961 i 1962. Ma duspues de la diagnosis de Alzeimer en el anyo 2008, Falk se travo de todos los echos, i su mujer de 32 anyos, Shera Donese, estuvo menajando sus echos.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın