Bialik-Rogozin, una eskola eksepsıonal en el korason de Tel Avıv

Bialik-Rogozin, una eskola eksepsıonal en el korason de Tel Avıv

En el korason de Tel Aviv, ay una eskola eksepsional, ande kreaturas de diferentes paizes i de diferentes entornos estan estudiando endjuntos. Kreaturas ke se fuyeron de la provedad, de gerras politikas, mezmo de jenosid, estudiando lado kon lado, ma dinguno de eyos no sintiendose komo ‘un etranjero’.

Kirk Simon, uno de los dos produktores de ‘Strangers No More’, el filmo israeliano ke gano el Oskar del Mijor Documanter, avlo sovre esta eskola.

Este filmo es bazado en la vida kotidiena en la eskola Bialik-Rogozin. En esta eskola, estan estudiando kreaturas de kuarenta i ocho paizes, kreaturas de refujados de gerra, i kreaturas de las nasiones las mas proves. En Bialik-Rogozin, estas kreaturas ke nasieron sin mazal, se estan embezando a meldar, a eskrivir, i a adaptarsen a sus muevo entorno.

Segun Kirk Simon, este Oskar va ayudar a atirar la atansion del mundo a la kestion de los ijos de los lavorantes emigrantes. ‘La mision de esta eskola deve de ser konosida en el mundo entero’ esta diziendo Simon.

El dokumanter esta amostrando, komo, estas kreaturas se estan esfuersando para pueder adaptarsen a la vida en una tierra mueva, i komo, poko a poko, estan empesando a kontar sus trajedias unos a los otros. Muhammed es un refujiado de diisesh anyos ke se fuyo de Darfur. Mataron a su nona i a su padre delantre sus ojos. Johannes vino a Bialik-Rogozin duspues ke estuvo munchos anyos en los kampos de los refujiados. Ester se fuyo de la Afrika del Sur, i vino aki para topar seguridad. Kon grande esfuerso, i kon la ayuda de la eskola, las tres kreaturas reusheron a empesar una vida mueva. Se adaptaron a sus profesores, i izieron muevos amigos.

El filmo estuvo en vizion en el Sinematek de Tel Aviv, en el mez de Enero, i entro a munchos festivales de filmos en los Estados Unidos, en Afrika, i en Ostralia.

Segun Kirk Simon, el mundo entero kale ke veyga la reushita de esta eskola situada en el sentro de İsrael. Los espektatores de kada paiz estan suivando el filmo kon lagrimas en los ojos. Munchas de estas kreaturas sufrieron muncho antes de entrar a esta eskola.  La eskola les esta ayudando muncho para pueder olvidar el pasado, i pueder formar una vida mueva. El filmo se fokuso sovre este sujeto.

Los komanterios de los espektatores afuera de İsrael, sovre este filmo, estan muy enteresantes. Munchos estan diziendo ke en este filmo vieron un İsrael ke no se imajinavan antes. El filmo les avio los ojos a una koza ke no teniyan una idea ke egzistiya. ‘Esto muy orgolyozo de prezentar al mundo un imajen mas kompleto de la vida de İsrael’ esta diziendo Kirk Simon. ‘Mos tomo un anyo para kompletar el filmo. En este anyo, suivimos, diya por diya, el trokamiento i el developamiento de las kreaturas. Ester, Muhammed, i Johannes reusheron a empesar una vida mueva, se adaptaron a esta vida, enfrente de muestros ojos.’.

La eskola Bialik-Rogozin gano reputasion en İsrael el anyo ke pasimos, kuando el problema de las kreaturas de los lavorantes etranjeros fueron el primer sujeto de las gazetas.

Un otro mesaje del filmo es ke ‘las kreaturas tienen el potansiel de trokar mezmo si tuvieron un pasado amargo’. Kuando estomos oyendo las trajediyas ke pasaron, mos esta parisiendo ke se vana espantar de la vida. Ma, en suivando el filmo, estomos viendo komo se estan engrandesiendo, komo keren ambezarsen todo, i komo estan reushiendo a formarsen una vida mueva.

Segun la direktora de la eskola Bialik-Rogozin, Keren Tal, la reushita de la eskola en la edukasion de estos ijikos, no puediya ser posivle sin ‘los mijores profesores del mundo’, i sin el ayudo de la munisipalidad de Tel Aviv, i del Ministerio de Edukasion. Keren Tal esta muy kontente ke el filmo esta amostrando al mundo, ‘un lado diferente de la vida kotidiena de İsrael’. ‘En este filmo, el mundo estan konosiendo las prensipales valores morales de los judios’ esta diziendo Keren Tal.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın