El teatro del Dostluk

El teatro del Dostluk

D.Y.D. Dostluk Yurdu Derneği es una asosyasyon ke arekoje los mansevos i mansevas djudyos; i aze ovras i aktivitades kulturales komo teatros, paseos, partis para adjuntar los djovenes en entegrandolos a estas aktivitades.

Esta asosyasyon es konosida sovre todo en el espasyo del teatro. Kada anyo mete a la shena una pyesa de teatro ande djugan aktores i aktrisas de todo modo de edad. Kada anyo puedemos distinguir el progreso de esta ovra muy presyoza.

Alhad pasado; mos fuimos kon mi marido i amigos a una de estas pyesas ke djugo en un salon de Maçka Teknik Üniversitesi; un salon grande de 600 personas. Es una grande kapachitad de pueder reushir a inchir 600 personas kada noche.

Los volontaryos ke lavoran en esta organizasyon lavoran de aryento del korason, kon muncha amor, ardor, pasyon (tutku), kerensya lo mas emportante, i esta ambisyon de reushir, kon la konfiensa ke tyenen, vensen (yenmek) todas las difikultades i depasan todos los detenimyentos (engelleri aşmak) de sus kaminos.

El nombre de la pyesa “Este Peshkado Es Otro Peshkado” (Bu Balık Başka Balık); ke se djugo kon grande reushitad; es una organizasyon muzikal de 70 personas.

Vos kero avlar un poko de esta komediya muzikal ke salyo en medyo kon muncho esforso; kon la ayuda de las kriyaturas chikas, kon los bayladores i bayladeras (dansçılar), i el dirijente kon los aktores i aktrisas.

La Direktora de la Muzika, una profesyonal ekstraordinarya “Serpil GÜNSELİ” ke kompozo todas las kantikas de esta pyesa de teatro ke mos izo pensar a las kantikas sefarades.

Los kostumes kuzidos de la parte de un profesyonal “Sadık Kızılağaç”; una persona reushida en “haute couture” kon los vestidos nostaljikos mos yevo a antes sesenta anyos. “Forti Barokas” eskrivyo esta pyesa i djugo kon una perfeksyon inkreivle. El direktor, administrador (yönetmen) “Uğur Babürhan” un profesyonal, el produktor “Moris B.Levi,” el koreograf “Yuri Mezock” i el direktor de arte (sanat yönetmeni) “Ferit KOEN” kitaron en medyo una ovra profesyonal; djugado kon muncha amor del mas chiko al mas grande, kon muncho talento (yetenek).

En el anyo 1942; el akto de teatro (perde) se avre en un balo ke se realizo en el otel muy konosido “Pera Palas”.  Todos baylando tango; un eskidji sale a la shena i ampesa a kontar akeya perioda (dönem).

En akeyos anyos de gerra en la Evropa, sale la ley de “Varlık Vergisi” en la Turkiya, i los ke no pueden pagar esta taksa (vergi), los embiyan a Aşkale.

Una famiya rika Musyu Salvator i Madam Virjini, pagan la taksa ma no les keda nada, kedan sin paras. Marido i mujer estan muy anksyozos i no saven lo ke van a azer. En avlando; se peleyan por un kapricho (inat) sin senso. Mizmo los esforsos de los ocho ijos no aprovechan, i la famiya se dezaze.

Es la istorya traji-komik de esta famiya; ke se dekoro kon karakteres enteresantes i alegres, ke mos izyeron de vez en kuando riyir, de vez en kuando pensar en esta pyesa sentimental. Despues de anyos; munchos renkontros por azardo (tesadüfen) i munchos evenementos auna esta famiya.

Dostluk; krea projektos grandes, i kada anyo uno mijor de otro. Porke pensan; komo i kualo pueden azer de mas bueno. Esta mirada al evenemento, los enkoraja i los yeva a la reushitad.

Para enalteser el nivel de la asosyasyon, los volontaryos; estan pensando i se estan kreyendo ke kale azer estas aktivitades para detener los mansevos endjuntos; i mozotros, la komunitad djudiya devemos de dar apoyo materyalamente i moralmente.

Todas las kantikas muy sentimentales; kon las bozes maraviyozas, la fuersa del djugo (oyun gücü), la dominasyon de la shena (sahne hakimiyeti), el dirijir esta pyesa, la orkestra, el dekor i los kostumes, las luzes, el makyaj, el livro ke se dyo a todos los partisipantes, vente sujetos diferentes para kreer este djugo.

Veramente es un lavoro de lokos!..

Arekojer a tantas personas, mujeres, ombres, mansevos, mansevas, kriyaturas, ayudantes ambezarles a kantar, avlar, djugar, azer provas, en dias i oras diferentes.

Kero felisitar a todos los ke izyeron las danses, i baylaron kon una armoniya ekstraordinarya, los aktores i aktrisas, Forti Barokas, Natan Siliki, Erol Eskenazi, Jaki Baruh, Jinet Zalma, Lili Doenyas, Viktor Nasi kon todos los otros, i lo mas muncho al Presidente del Dostluk İzi DOENYAS; ke suporto todas las difikultades de los evenementos i de las personas; seya en el interval del lavoro, seya en el sentro ande se djugo.

Syempre de mijor a mijor...

Felisitasyones; a todos los dirijentes del DOSTLUK; de tener la veluntad de krear estos projektos; para pueder detener la manseves djudiya entre eyos i para evitar la asimilasyon.

La amistad ke tenej entre vozotros, ke puje de dia en dia para motivar i adelantar vuestra organizasyon kon munchas reushitades.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın