Rozet Hubesh en el diya de solidaridad de la asosiasion Golden Age

Rozet Hubesh en el diya de solidaridad de la asosiasion Golden Age

El 29 de Marzo, diya de Martes, los miembros de la asosiasion Golden Age, fiestaran el diya tradisional de solidaridad de la asosiasion. Las prezidentes de las enstitusiones, organizasiones i asosiasiones de muestra komunidad fueron envitadas a este diya.

La Prezidente Meri Maya disho ke, a la okozion del Diya Mondial de Teatro (ke es el 27 de Marzo), en la aktividad de oy, vamos a kompartir el tema de teatro kon la famoza artista de teatro, Rozet Hubesh.

Meri Maya, tambien ajuto ke este anyo estan selebrando el diezen anyo del establisimiento de la asosiasion Golden Age. Diez anyos antes, esta asosiasion empeso a lavorar kon unas kuantas dammas volontarias, i kon sukuenta ayedados. ‘Oy tenemos mas de dozientas i sukuenta ayedados’ disho la prezidente. ‘Vijitamos los ayedados en sus kazas, mos okupamos de sus problemas, organizamos siertos diyas para ke developen sus talentos i ke esten endjuntos, i lo mas emportante, los yevamos a munchas aktividades artistikas, o a restoranes para divertirlos. De vez en kuando, los yevamos a los teatros de muestra sivdad, o a los teatros de muestra komunidad. Mos alegramos de ver ke estan tomando grande plazer de asistir endjuntos a estas aktividades’ disho Meri Maya.

Mas duspues, la prezdente envito Lida Sarfati a la shena, para ke prezente Rozet Hubesh a las envitadas.

Antes de empesar a avlar sovre el tema del diya, Rozet Hubesh mos disho ke, diez anyos antes, eya era un miembro de la asosiasion Golden Age, ma komo su profesion siempre le tomo muncho tiempo, eya no puido kontinuar a lavorar kon las otras dammas. ‘Kuando me va retirar, esto pensando de tornar atras, i a kontinuar a lavorar kon vozotros’ disho la artista.

‘Diez anyos paso desde la primera reunion de Golden Age. Oy, aki, esto viendo munchas karas konosidas, i esto remarkando ke los anyos no izieron munchos trokamientos en estas karas’ ajuto Hubesh.

‘Kuando me ize de kuarenta anyos, enduna me apersivi ke me esto aziendo vieja. Ma viendo la enerjia de mi profesora, la famoza artista de teatro Yildiz Kenter ke teniya setenta anyos akeyos diyas, entendi ke no me esto envieshesiendo, ma ke me esto engrandesiendo’ disho Hubesh. ‘Munchos de mis premios los tomi kuando era de kuarenta anyos’ ajuto la artista. ‘Agora tengo sukuenta anyos. Kuando me miro al espejo, me veygo rigas en la kara. Ma agora ya se ke estas rigas son mis eksperiensas, mis alegriyas i mis lagrimas. Oy, mi profesora Yildiz Kenter tiene ochenta anyos, i dainda esta djugando en una piyesa, i esta tomando grande gusto de kada punto del djugo’.

Mas duspues, la artista mos meldo un pasaje de una estorya de vida de una eskridora amerikana. La filozofiya de la estorya era ‘tomar plazer de la vida’, gozar kada momento ke estomos biviendo, i aprovechar kada oportunidad ke mos se prezenta.

La semana pasada, los miembros de la asosiasion Golden Age, los yevaron a los ayedados al Komplekso de la Sinagoga de Caddebostan, ande los artistos de muestra komunidad djugaron una piyesa. ‘Entremientes, yo estava obzervando los ayedados’ esta diziendo Hubesh. ‘Vide ke los ayedados estavan muy alegres, djusto komo si ke estavan en un ‘Wonderland’.

Rozet Hubesh mos konto ke en un livro del doktor Mehmet Oz, eya meldo ke los hazinos viejos optimistos se estan aziendo buenos mas presto de los hazinos mansevos pesimistos. Komo disho el eskridor ‘La vejes no viene de la edad de la persona, ma de la manera ke eya esta entrepretando la vida’.

Las mujeres las mas enerjikas i laboriozas de muestra komunidad ke todos admiramos, Klara Perahya, Silvia Filiba, i Beki L. Behar, nunka no se vana azer viejas’ disho Hubesh.

Mas duspues, Hubesh respondio las kestiones de las envitadas. Doli Saban mos avlo de la grande amistad de su ijo Nedim Saban por el arte de teatro.

Al kavo de la aktividad del diya, Lida Sarfati la yamo a la madre de la artista por ke le prezente a su ija la plaketa ke aparejaron las dammas de Golden Age.

Te estomos remersiando Rozet Hubesh por ke mos izites akodrar esta ermoza filozofiya. İ, lo mas emportante, vos estamos remersiando las dammas de Golden Age, por todo lo ke aznesh por los ayedados de muestra komunidad.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın