La estorya de Purim fue el tema preferado de Rembrandt

La estorya de Purim fue el tema preferado de Rembrandt

La estorya de Esther fue el tema de munchos pintores en la historya.

Entre los anyos 1624-1685, el famozo pintor Rembrandt, sus elevos i sus kolegos, tomaron sus temas de diversas etapes de la estorya de Esther.

Uno de los primeros artistos holandezos ke pinto una sena de Purim, fue Pieter Lastman, ‘La Viktoria de Mordehai’. Rembrandt fue enfluensado de esta pintura de Lastman.

Jan Lievens, un elevo de Lastman, eskojo el momente ke Esther revelo al rey la traizion de Haman i su entision de destruir el puevlo judio, ‘Fiesta de Esther’.

Una de las primeras pinturas de Rembradt fue ‘La Grande Novia Judia’. ‘Haman Demandando Apiadar de Esther’ es una otra famoza pintura de Rembrandt.. La pintura‘Esther Ahashverosh i Haman en la Banketa’ esta reflektando el konflikto entre los tres.

Kuando Rembrandt muryo en el anyo 1669, los judios de Amsterdam yoraron muncho porke peryeron un amigo.

 ‘Esther i Amon delantre de Ahashverosh’ es una pintura de Jan Victor, uno de los elevos de Rembradt.

La pintura ‘Esther i Mordehai’ del pintor Aert de Gelder, esta reflektando el momento kuando Mordehai esta diziendo a su sovrina lo ke deve de azer para savlar a su puevlo. Una otra pintura de Gelder ‘Esther Adornada por sus Ayudentes’ esta reflektando la sena antes la peligroza rankontra de Esther kon Ahashverosh. En una otra pintura de Gelder ‘El Rey Ahshverosh Kondemnando Haman’ esta reflektando la sena kuando el rey esta matando Haman kon su arma. Haman se esta eskondiendo en el obskuro.

Estas todas pinturas de los artistos esta trayendo al tino una kestion – ‘Deke los artistos hollandezos se enteresaron tanto en la estorya de Esther?’

Ay razones prensipales ke eksplikan sus entereso en la estorya de Purim.

Rembrandt era personalmente fasinado por el Testamento Antiko. Komo el biviya en un kartie judio de Amsterdam, el se sintiya muy serka a los judios i a la Bibla. Kuando era chiko, su madre le meldava pasajes de la Bibla. Entremientes Rembradt mirava a las fotografias del livro, arekojiendo enspirasion de la pajinas. Los dos Testamentos le prokuro sujetos por developar su talento artistiko.

En el anyo 1634, Rembrandt se kazo kon una mujer rika, i empesaron a bivir una vida rika. Se merkaron una kaza en el mas luksozo kartie de Amsterdam. Rembrandt no teniya problemas ekonomikos, i no teniya menester de lavorar komo lo devian los otros artistos de su tiempo.. La rikeza de su mujer le dio la libertad de lavorar kon los estudiantes de arte en su studio.

Ademas, Rembradt tuvo una sempatia al judaizmo. A traver de su amistad i entimidad kon los mas emportantes personajes judios de Hollanda, Rembrandt empeso a enteresarse a la sinyifikasion profonda del Tanah.

En akeyos anyos, en Hollanda aviya una tolerensiya relijioza, i aviya munchos entelektuales judios. Las famiyas judias tenian ganasias buenas, i tenian el gusto de bivir. Los rikos davan grande emportansia al arte, i merkavan pinturas para dekorar sus kazas. Naturalmente, los judios preferavan pinturas bazadas en historias tomadas del Tanah.

En akeya epoka, los judios portugezes ke aviyan fuyido de sus paiz, i aviyan trayido una grande kantidad de eksperiensa i konosimientos kon eyos a Hollanda. La Republika Hollandeza se aviyo echo el paiz el mas floresiendo de Evropa, en los kampos kultural i ekonomiko. Los judios portugezes i espanyoles se enstalaron en Amsterdam, i ayudaron a enstalar la endustria de diamante en Amsterdam.

Komo los judios eran permetidos de pratikar sus relijion, eyos aziyan todos los servisios relijiozos, i teniyan todo modo de fasilidades en sus komunitades.

Esta libertad de los judios era totalmente diferente del estado de los otros judios ke bivian en otros paizes, i ke devian de eskonder sus servisios relijiozos. Esta diferensia se viya mezmo en la arshitektura de las Sinagogas. En las senas historikas de las pinturas no aviyo kristianos krusifikados, Madonnas yorando, o judios mirandolos kon malisia, komo era en los otros paizes. Los judios hollandezos estavan puediendo topar pinturas ke puedian merkar en sintiendosen orgoliozos.

Ademas, en akeya epoka, los hollandezos se viyan komo el İsrael muevo, i viyan Espanya komo el kruelo tirano. Kon la estoria de la selebrasion de Purim, los Hollandezos puedian eksplikar el mirakolo del Dio en sus propria jenerasion.

En la revolusion de Hollanda kontra Espanya, los lideres de la revolusion fueron identifikados kon los lideres de la Bibla, i los tiranos fueron identifikados kon Faraon, Haman, i Nabukodonasor. Los hollandezos estavan komparando sus pais a la tierra de Kenaan.

Por munchos anyos, los artistos hollandezos kompararon los hollandezos kon los judios de Persia. Esther i Mordehai fueron modeles de endependensia. El livro de Esther fue el prensipal sujeto de los artistos hollandezos. Teatros prezantaros ovras bazadas en el Livro de Esther. Un oratorio kon el nombre de Esther fue kompozado por Handel. El famozo poeto hollandezo Van den Vondel eskrivio dos poemas bazadas en la estoria de Esther.

Por munchos anyos, Esther i Mordehai fueron la personifikasion de los hollandezos buenos.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın