La selebrasion de la fiesta de Hanuka en la Sinagoga de Caddebostan

La selebrasion de la fiesta de Hanuka en la Sinagoga de Caddebostan

Komo kada anyo, i este anyo, el 5 de Desembre, diya de alhad, la fiesta de Hanuka se selebro en la Sinagoga de Caddebostan, kon la partisipasion del Grande Rabino İzak Haleva, el Rabino Yeuda Adoni, el Prezidente de la Komunidad Judiya Sami Herman, los administratores de las enstitusiones, de las organizasiones, de las asosiasiones, i de los yahides.

La selebrasion empeso kon la kantika ‘Baruh Aba’ (Bienvenida), del koro de las kreaturas del Talmud Tora, i de los miembros del grupo ‘Las Estreyikas d’Estambol’.

El Prezidente de la Fondasion de la Komunidad Judiya de Kadikoy, Mayir Saranga, mos avlo sovre la fiesta, i de la emportansa de la edukasion judiya. ‘La kultura judiya es muy rika’ disho Saranga, ‘porke la kultura judiya fue enfluensada por diversas kulturas a lo largo de la istorya. Esta rikeza se ve en las ovras de los artistos judios’. Saranga tambien avlo de los planos de la mueva administrasion de la Komunidad de Kadikoy. ‘Vamos a azer todo muestro posivle, para pueder dar el mijor servisio a los miembros de la komunidad de Kadikoy’.

El Prezidente del Talmud Tora de Caddebostan, İzak Babat, mos konto la istoria de Hanuka. Babat koninuo su diskorso diziendo ‘Los Makabis teniyan muy poka azete. Ma eyos no se retiraron de asender mezmo la una sola kandela. El Dio izo un miriakolo, i kon esta poka azete, todas las ocho kandelas se asendieron. Esto deve de ser un egzamplo por mozotros. Mezmo si no tenemos sufizante luz para illuminar el mundo entero, no mos vamos a retirar, i el Dio mos va ayudar. Esta luz ke mos va illuminar es la Tora. La Tora siempre mos va amostrar el kamino djusto’.

Las kreaturas del koro, mos kantaron kantikas de Hanuka, i los elevos de Talmud Tora mos djugaron una piyesa sovre los Makabis.

El Rabino Yeuda Adoni mos avlo de la gerra de los Makabis. ‘Los Makabis, emprimero gerreyaron kon los judiyos, para azerlos adaptar la kultura judiya, i salvarlos de la enfluensia de la kultura helenika. Duspues ke reusheron esto, los Makabis gerreyaron por pueder liberar los judiyos. La kontinuasion de la kultura judiya se prokura kon la kontinuasion de muestras tradisiones en muestras kazas’.

Los elevos del Talmud Tora mos dramatizaro la istoria de Hanuka, empleyando los teknikos de la teknolojiya moderna.

El Prezidente de la Komunidad Judiya, Sami Herman, disho ke, empleyando los teknikos modernos, la selebrasion de Hanuka de este anyo fue muy reushida, i mos pujo el antiziazmo i la emosion. Herman felisito los miembros de la komunidad de Kadikoy, por sus asierto de mantener las tradisiones judiyas. ‘El Dio siempre kreyo mirakolos por la nasion judiya, i mozotros siempre vamos a lavorar, i vamos a azer muestros posivle, i el Dio siempre va estar kon mozotros’.

El Grande Rabino İzak Haleva, mos disho ke, en akeyos diyas, los Makabis no desharon ke los judios empleyen mezmo la azete de los helenikos, i los forsaron a empleyar ‘la azete kasher’. La razon de esto es, evitar el kontakto kon los paganes, alesharlos de la kultura helenista, i forsarlos a adoptar la kultura judiya’.

A la fin de la selebrasion, las kandelas de la Menora se asendiyeron kon la partisipasion de todos, en diziendo la orasion, todos endjuntos.

Oguramos, ke puedamos selebrar todas las fiestas, kada anyo, kon sanedad i alegriya.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın