Los turıstos de Tudela vıjıtaron muestra sıvdad

Los turıstos de Tudela vıjıtaron muestra sıvdad

Los primeros diyas de Novembre, un grupo de turistos de Tudela (una sivdad en el norte de Espanya), vinieron a muestro pais kon la organizasion de Ela Turizm, dirijado por Eli Arditi, Becky Sulam, i Reina Leon. Duspues ke vijitaron la komunidad judia de İzmir, i las Sinagogas de İzmir, los turistos espanyoles arivaron a Estambol.

Desde el anyo 2006, en la direksion del Alkalde de Tudela, Luis Casado Oliver, i Jesus Alvado (miembro responsavle de turizmo en la asamblea de Tudela), grupos de turistos estan vijitando las komunidades judias en la Evropa, estan aziendo el kamino ke Benjamin de Tudela (un pelegrino judio) izo ochosientos mil anyos antes.

Duspues de sus retorno a Espanya, los turistos estan dando konferensias en diversas sivdades, estan amostrando las fotografias de los lugares ke kaminaron, en dando enformasion sovre komo un tal viaje se puede azer. El buto de estos viajes es, entroduisir Tudela al mundo, i developar el turizmo en la sivdad.

La noche del 8 de Novembre, en la prezensia de los miembros de la komunidad judia de Estambol, los responsavles del İnstituto Cervanantes, i de los turistos espanyoles, el Alkalde de Tudela, mos dio una konferensia sovre Benjamin de Tudela, i sus viajes, kon la ayuda de efektos vizuales 

Benjamin de Tudela es un pelegrino ke bivio en Tudela, entre los anyos 1130-1175. Benjamin era el ijo de un teologo judio. Duspues ke kompleto sus viajes, el pelegrino eskrivio un livro en ebreo, sovre las komunidades judias ke el vijito. Mas duspues este livro fue traduizado en espanyol kon el nombre‘’Livro de Viajes de Benjamin de Tudela’’.

La noche suivante, kon la organizasion de Eli Arditi (miembro de la Administrasion de la Komunidad Judia de Kadikoy, i posedor de Ela Turizm), los turistos fueron ospedados en el komplejo de la Sinagoga de Caddebostan. Los turistos kaminaron el edifisio de la Asosiasion Kultural de Goztepe, tomaron enformasion sovre las aktividades de la asosiasion. Mas duspues, los envitados fueron orientados al salon ande se dio la komida de noche. Los turistos admiraron la savor de las komidas, i se maraviaron a la diversidad de komidadas aparejadas segun las reglas de kasher.

Los artistos Lizet Deadato i İzi Eli, kantaron kantikas en judeo espanyol. Algunos turistos se akodraron de estas kantikas ke oyeron de sus nonas. Serka la fin de la nochada, los turistos akompanyaron los artistos en kantando, todos endjuntos, modernas kantikas espanyolas. 

A la fin de la nochada, el Alkalde de Tudela, mos prezento el livro de Tudela, i el livro de Benjamin de Tudela, komo regalo por la biblioteka de la Sinagoga de Caddebostan. Tambien mos ato panuelos kolorados a la garganta de kada uno. Este panuel kolorado kon el amblem de Tudela kuzido ensima es el sembol tradisionel de la sivdad.

Antes del retorno al otel, mos fotografeyimos todos endjuntos. Los turistos mos remersiaron por muestra senseridad i muestra ospitalidad, diziendo ke estuvieron muy kontentes de konoser muestra komunidad, i de oyer la lingua judeo-espanyol, i las kantikas en judeo-espanyol.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın