La memoria de Dona Gracia

La memoria de Dona Gracia

El 500 aniversario de Dona Gracia se selebro dos semanas antes, en Beit Hanassi.

Dona Gracia (Gracia Mendes Nasi) es de una famiya de maranos de orijin, de Aragon ke se fuyeron a Portugal, kuando la reyna İsabel i el rey Fernando ekspulzaron los judios en el anyo 1492.

Munchos romanes fueron eskritos sovre Dona Gracia, ma Gracia entro a la konsiensia de los İsraelianos, en los anyos dalkavo.

El solo lugar en İsrael , ande su memoria egzistio por munchos anyos, es Tiberia, ande ay un ‘Dona Gracia Muzeo’. Este muzeo nombrado komo ‘Kaza Dona Gracia’ se topa en una parte del ‘Otel Dona Gracia’. Los proprietarios de este otel son de una famiya sefarad, la famiya Amsalem, ke biven en Tiberia por munchos anyos, i ke tienen raizes en Moroko i en Turkiya. La famiya Amsalem i la Munisipalidad de Tiberia, penaron munchos anyos para ke los israelianos la konoskan.

Este muzeo esta organizando seminarios, en las fin de semanas, sovre la vida i los tiempos de Dona Gracia. Geula Kohen (la ex-deputada de los oteles de Tiberia) fue tanto empresionada de la estorya de Gracia, ke eya izo grande presion al Ministerio de Edukasion para pueder enkluir el estudio de Dona Gracia en los programes de las eskolas.

Oy, Dona Gracia empeso a salir de los naftalines del pasado. Los elevos de lise, i los soldados se vana ambezar los planes ke Dona Gracia aparejo, para enstalar una komunidad judia otonoma en Tiberia, ke era la mas grande sivdad de Galile, i el mas grande sentro de la edukasion judia, entre el segundo i el diezen siglo.

La selebrasion del 500 aniversario de Dona Gracia tomo lugar en la prezensia del Prezidente Shimon Peres, Yitzhak Navon (Prezidente de la Otoridad Nasional de los Ladinos), Giden Saar (Ministro de Edukasion), Avigdor Lieberman (Ministro de Relasiones Eksteriores), i Dorit Beinisch (Prezidente del Tribunal Supremo), i tambien en la prezensia de munchos dignitarios.

Peres disho, ke es mas fasil de alkansar a las alturas de la montanya Everest ke de alkansar a azer las kozas ke izo Dona Gracia. Eya reusho a azerse remarkar en la Evropa, i kon su rikeza reusho a enfluensar el sultan de Turkiya. ‘Gracia era una mujer muy jeneroza, i un grande lider. Eya fue la primera en su vizion de una patria judia’ disho Peres. Peres avlo tambien de los viajes de Gracia, konto komo eya salvo los judios ekspulzados de Espanya i Portugal, i komo eya prokuro refujio para los konversos. Gracia muryo kuando teniya 49 anyos.

Kuando Gracia nasyo, su padre le dio el nombre Beatriz de Luna Miguis, i fue baptizada en Lizbon. Kuando teniya 12 anyos, Gracia deskruvio ke eya no era de orijin kristiana, i ke era la ija de una famiya judia. El nombre de su padre era Shmuel Nasi, i eya se yamava Hana Nasi.

Kuando vino a 18 anyos, su padre la kazo kon Francisco Mendes, kon una seremonia en una eglizya katolika. Gracia no puido entender komo su padre la kazo kon un kristiano, savyendo ke eran judios. Ma, en poko tiempo, Gracia se ambezo ke su marido tambien era konversao, i izieron una segunda boda konfirmada kon la ley de Moiz, en İsrael. Gracia tuvo una ija, Reina. Malorozamente, Gracia peryo a su marido kuando teniya 25 anyos. Su marido le desho una grande rikeza, barkas, la segunda grande banka en la Evropa, i munchas paras. Gracia  utilizo estas paras para ayudar a los judios. Grasias a la grande suma ke eya dio al Papa, el establisisimiento de la engizision en Portugal tadro buen karar.

Su ermana, de su selo, la denonsio a las otoridades, ma kon la ayuda del sultan de los otomanes, Sultan el Manyifiko, eya fue liberada.

Gracia konvensio el Sultan para pueder alkilar Tiberia, ande eya keriya konstruir la vieja gloria judia. Entremientes, eya pago la konstruksion de las Sinagogas, lugares de estudio, lo menester por ke la presa ebrea kontinue a lavorar en Tiberia, en los lugares ande moravan judios. Gracia embiyo mas judios a bivir en Tiberia, i pago para ke seyga la sivdad de muevo konstruida. La konstruksion de la Muraya del Sur fue kompletada en poko tiempo. Gracia teniya la entision de emigrar de Turkiya a la Tierra Santa, ma malorozamente muryo antes ke pueda realizar este dezeyo. 

Oy, Dona Gracia salyo a la luz duspues de tantos anyos, Esperamos ke va reflektar su luz ensima de los mansevos , i va aklarar sus kaminos.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın