Komo pueden dar un Oscar a un antisemisto?

Komo pueden dar un Oscar a un antisemisto?

Segun un artikolo ke meldi en una gazeta, la Akademia de Sinema en Hollywood, tiene la entision de dar un Oscar a un direktor fransez, Jean-Luc Godard, en el tredje de Novembre. Komo puede la Akademia onorar un antisemisto?

Godard es admirado por los ‘avant-garde’ filmos ke aze, ke es un muevo muvimiento del sinema. Su kolego i amigo viejo, François Truffaut, es tambien admirado por sus filmos de  este muvimiento.  Ma la amistad entre los dos amigos, se eskapo por modo del antisemizmo de Godard. Truffaut se aravio kon Godard por modo de la ensulta ke izo Godard al produktor Pierre Braunberger, en yamandolo ‘suzyo judio’.

Segun los eskritores de la biografia de Godard, Godard tiene una obsesion kon los judios. Segun el, el Estado de İsrael es ‘un kanser en la mapa del Medio Oriente’.

En un  dokumanter ke Godard aparejo en el anyo 1976, ‘İci et Ailleurs’, Godard esta amostrando el kontraste entre la vida de una famiya franaseza i una famiya palestiniana, i esta metiendo las fotos de los dos lideres, Golda Meir i Adolf Hitler, lado kon lado, yamandolos ‘los dos tiranos’. En el mezmo filmo, Godard esta tambien defendiendo el asesinato de los deportistos israelianos en los djugos de las Olimpiadas de Munih, en el anyo 1972, i esta ajutando ke, en el final de kada Olimpiada, kale meter a la sena las fotos de los kampos de los palestinianos refujiados.

En un otro dokumenter del anyo 2007, ‘Morceaux de Conversations’, Godard esta diziendo ke los israelianos estan okupando ‘la tierra ke esta eskrita en las estorias de la Bibla’.

Godard esta justifiando todos los aktos de la resistansia araba, mezmo el terorizmo, diziendo ke lo ke esta aziendo İsrael es una forma de Nazizmo, i esta empleyando el nombre ‘Nazİsreal’ en avlando del estado judio.

En su filmo de este anyo, ‘Film Socialisme’ ke partisipo al Festival de Cannes en el mez de Mayo, Godard esta avlando de Hollywood, diziendo ke Hollywood es estranyo porke es los judios ke lo envantaron. En este filmo, Godard esta kritikando el sinema de Hollywood, i los produktores judios, espesialamente Steven Spielberg.

En el anyo 1973, kuando uno de sus kolaboratores, Gorin, kontakto Godard por tomar la paga del filmo ke izieron endjuntos, Godadard le respondio: ‘Siempre es lo mezmo, judios te bushkan kuando tienen de tomar paras’.

En un artikolo de Jean Luc Douin, ‘La Kestion Judia’, ke salyo en el periodiko Le Monde, del anyo 2009, Godard esta diziendo ke ‘los palestinianos estan utilizando bombas de suisidio para establiser un estado palestiniano  komo izieron los judios en el Holokosto, en sakrifiando almas en las kamaretas de gaz, para pueder kreer el estado judio’. Segun Godard, los judios, es eyos ke izieron el Holokosto kon la entision de establiser un estado judio. En el mezmo artikolo, Godard esta diziendo ke ‘Hollywood fue envantado por gangsteres judios’.

Kuando estas deklarasiones antisemistas de Godard fueron prezantadas a la Akademia de Sinema, la repuesta de la Akademia fue ‘Godard izo estas deklarasiones en el pasado, i estas deklarasiones fueron entrepetadas komo antisemizmo. La Akademia de Sinema no esta akseptando estas akuzasiones kontra Godard, diziendo ke no estan persuasivas, i ke no se konvensieron ke esto es antisemitizmo’.

Los judios estan muy kuriozos para ver si en el tredje de Novembre, Godard va resivir un Oscar. Akeya vez vamos a dizir ke ‘Hollywood es, de verdad, un lugar estaranyo ande la Akademia esta onorando los desonorados’.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın