Kerensya a los aedados

El tyempo yelo, ya se puede dizir ke el invyerno ya vino kon las luvyas  i el tyempo ariskuro i ennuvlado. Esta atmosfera eskura de la sezon traye el pesimismo i es proporsyonada kon el korason de la persona.

Este tyempo ariskuro me traye al tino la soledad i la vejez, i por esta kavza el invyerno para mi es una sezon ke no me plaze del todo.

La vejez es una periyoda ke no eksprime nada en la manseves. El dezeo de todas las personas es; una vida larga kon sanedad i entornados kon todos sus keridos, komo la famiya, amigos i amigas....

Kale bivir la vida muy yena i por esto; kale meldar muncho para kultivarmos i no olvidar, viyajar, azer spor para estar muy aktivos fina la fin, i munchas otras kozas. No kale ser pesimistos, para no afedentar al den frente.

Yo penso; ke todas las periodas en la vida de una persona tyenen una valor diferente. Kon la edad, la eksperyensa puja, i la mirada de la persona troka; el komporto, la tolerensya, la aprovasyon (kabullenmek), todo deviene mas positivo.

De vez en kuando mos sintimos muy kansoz, dezganados, abatidos i aedados.

Kuando keremos empesar una tentativa (girişim) mos dizimos entre mozotros “Ya es muy tadre para mi ! Ya me envyejesi. Kaliya ke lo azyera antes anyos”, i otras eskuzas (mazeret).

No kale asperar, no kale pensar el tyempo ke paso; ma kale topar la fuersa para azer oy mizmo lo ke dezeamos de azer. No es tadre nunka; kuando se kere veramente. Kerer azer una koza, es la miyatad de la reushitad.

La vejez traye endjuntos la soledad. Kale tomar las prekosyones (önlem) de la soledad  en la manseves.    Kale desvelopar (geliştirmek) relasyones pozitivas kon el entorno, formar fuertes relasyones familyales, dar emportansa a la vida sosyal, azer para si, hobis komo desinar, ambezar una lingua, dar emportansa a las vijitas de las fyestas, vijitar los hazinos, i munchas otras kozas.

İyir al doktor para las dolores, i para ser egzaminados por ver si estamos sanos i rezyos, iyir a las organizasyones de vyejos para topar amigos, salir i kaminar en la natura, ver a los inyetos; esto todo es una terapi para pueder produisar (üretmek) solusyones para la vejez.

En muestro pais; i en muestra komunitad; apatronarse de los aedados; es una valor muy emportante.

La baza de pueder bivir endjuntos i de la solidaridad; es la Kerensya i el Respekto resiproko. Por esta kavza; kale akudirlos para pueder aminguar sus problemas i topar solusyones para ke bivan mas orozos.

Muestra misyon deve de ser; de amostrar la kerensya i el respekto menesterozo a muestros aedados; i lavorar para kitar sus apretos de korason, i para atarlos a la vida.

Los vyejos son los espejos de muestro avenir.

Empesando de muestras famiyas, madres, padres, tiyos, tiyas kale avrir los brasos a todos los aedados, i en muestra komunitad ay organizasyones ke se estan okupando de eyos.

“GOLDEN AGE” ke sinyifika “LA EPOKA DE ORO”; es una organizasyon emportante ke se okupa de las nekoçeras i nikoçiris.

La presidente muy laboryoza i devuada (fedakar) Meri MAYA, kon su ekipa de trenta volontaryas ke estan lavorando kon muncha ardor i devuamyento.

La semana pasada me envitaron a Yıldırımspor, para azer una konversasyon kon eyos.

Djugeves me fui a las doz de despues de midi. İ komo de risivida!., de las volontaryas i de los partisipantes de Golden Age. Veramente me izo muncho plazer.

Estavan bevyendo çay i kafe, i komyendo borekitas, boyikos, dulsuryas, todo bueno, i muy byen preparado.

İzimos un moabet de una ora i medya sovre los rekuerdos de antes de sinkuenta anyos.

Yo komo nasi en “Frej Han” Galata, les konti la vida de antes anyos, ande i komo biviyan los djudyos, komo era el vizindado, la kerensya ke egzistiya entre todos, el respekto ke aviya entre los chikos i los paryentes, las konsejas de mi nona ke eran muncho mas enteresantes de la televizyon.

Todo era muy diferente. La manera de bivir, el respekto de sintir al den frente, la ermandad ke egzistiya, todos akudiyan (yardım etmak)  a los ke tyenen menester.

Komo se fyestavan las fyestas i las noches de shabat!..

La vida era mas simple (sade). No aviya hadras i baranas, mostrar al den frente.......

Todos biviyan por si i estavan muncho mas orozos mizmo ke no aviya munchas fasilitades komo oy.

Pasimos un diya maraviyozo, kontentes de parte a parte. Unos kuantos kontando sus rekuerdos en diversos sujetos.

El plazer el mas grande fue para mi, de ver a todos enteresados sin enfasyarsen.

Remersyo a la presidente de Golden Age, ke me organizo la posibilitad de avlar kon los aedados  ke son muy sakros para mi.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın