Mark Zuckerberg, El Fondador Del Siteo FACEBOOK

Mark Zuckerberg, El Fondador Del Siteo FACEBOOK

Mark Zuckerberg, el fondador de Facebook, es un siantifiko enformatiko de ordenador, i un filantropisto. Oy, el es el konsejero i el prezidente de Facebook.

Facebook fue fondado komo una kompania privada en el anyo 2004  por Zuckerberg i sus amigos de eskola, en la Universidad de Harward.

En el anyo 2010, Zuckerberg fue nombrado komo ‘la Persona del Anyo’ por la revista Time.

Zuckerberg nasyo en New York, en el anyo 1984. Su madre es psikiatrista, i su padre es dantisto. El fue engrandesido komo judio, i izo su barmitzva kuando teniya tredje anyos. Ma agora el dize ke es ateisto.

Mark, siendo muy entelijente, fue un buen elevo en la eskola, i resivio munchos premios en los estudios de siansia (matematika, astronomia, i fizika), i en los estudios klasikos. El se ambezo a meldar i eskrivir en fransez, ebreo, latin, i grego antiko. En la eskola, Zuckerberg era tambien kapitano del ekipo de eskrima.

De ke era un ijiko, Zuckerberg tuvo una grande mirikiya por el ordenador. El empeso a utilizar el ordenador i a eskrivir software kuando estava en la eskola segunda. Su padre le tomo un profesor de ordenador  para ke pueda developar este dono. Mas duspues, Mark asistio a un korso de ordenador. En poko tiempo, Zuckerberg empeso a azer programas de komunikasion i de djugos en el ordenador. En estos anyos, Mark le aperejo un programa de software a su padre ke es dantisto, para ke pueda komunikar entre su kaza i su ofisio.

En el segundo anyo en la Universidad, Mark empeso a azer programas por los elevos. El primer programa ke se yama ‘CourseMatch’, era para ayudar a los elevos a eskojer las klasas ke kerian. El segundo programa fue ‘FaceMatch’, ande todos los elevos del dormotorio metieron sus fotos. Segun su amigo Arie Hasit, Zuckerberg kreo este siteo por distraksion. Los vizitantes del siteo devian eskojer el mas atraktivo elevo entre las fotos, i segun los votos, se aparejava una klasifikasion. Ma, en unos kuantos diyas, este siteo fue serrado, porke tanto popular se izo el siteo, ke el servidor de la universidad no puido mas alkansar a todo, i los elevos no estavan puediendo alkansar al web. Ademas, munchos elevos se kesharon ke sus fotos fueron utilizadas sin sus permision. Zuckerberg se ekskuzo publikamente, i munchos elevos eskrivieron artikolos diziendo ke este siteo es improprio.

Ma, entremientes, munchos elevos empesaron a dizir ke este siteo los entereso muncho, i se adresaron a la universidad por ke les avran un siteo asemejante.

Zuckerberg oyo las demandas de los elevos, i disho ke si la universidad no tiene entision de azerlo, el va konstruir un siteo ke va ser mijor del primer.

Ansi, en el anyo 2004, Facebook empeso komo un siteo de Harward asta ke Zuckerberg se desido de ekspandirlo a otras eskolas kon la ayuda de su amigo Dustin Moskovitz.

Mas duspues, Zuckerberg i Moskovitz, alkilaron una kaza i un ofisio en California, ande se konosieron kon Peter Thiel, el inversionisto de la kompania. En poko tiempo, Facebook se izo muy popular en el mundo entero.

Viendo la popularidad de Facebook, munchos korporasiones kijeron merkar este siteo, ma Zuckerberg no aksepto dinguna de estas propozisiones. En una entrevista de la revista Wired, en el anyo 2010, Zuckerberg disho ke lo ke le emporta no es las paras, ma es la mision de krear un mundo avierto, ande todos estan puediendo komunikar unos kon los otros, en mezmo tiempo.

En su livro ‘Heroes of the Computer Revolution’, Stephan Levy eskrivio ke Zuckerberg disho ke ‘el es un hacker’, ma  ke ‘es bueno de romper kozas para azerlas mas mijor’.

El siteo Facebook tiene munchas aplikasiones diferentes, komo muzika, komida, djugos, i munchos otros sujetos. ‘La idea es de pueder konstruir kada vez una koza mueva, i esto es parte de mi personalidad’ esta diziendo Zuckerberg.

En el anyo 2010, la revista Vanity Fair, lo nombro a Zuckerberg, komo Numero 1, en su lista de ‘las Sien Personas las mas İnfluyentas de la Epoka de Enformasion’.

Este anyo, en el Oscar, ay una fuerte prezensia judiya en munchas de las kategorias. El filmo ‘The Social Work’, ke es un portre del fondador de Facebook, esta  entre los filmos nominados por el Oscar 2011.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın