La gastronomia de los Sefaradis

La gastronomia de los Sefaradis

En esta pajina munchas vezes ya meldatesh sovre el lavoro de la asosiasion Sepharadic Center de Estanbol, dirijado por Karen Gershon Shalhon. Este anyo, los miembros de este grupo,  kompletimos un proyekto nombrado komo Ladino Database ke tuvo komo buto de azer entrevistas kon personas ayedadas, ke tienen el judeo espanyol komo lingua maternal. Muestro buto fue de arekojer dokumentos oral en judeo espanyol. Estas entrevistas ke izimos kon los ayedados, fueron anrejistradas al teyp, i duspues las eskrivimos biervo por biervo al komputador. Este lavoro va ser un dokumento muy emportante de archiva por los linguistos de la lingua judeo espanyol, i estas archivas se vana topar en diferentes universitades del mundo. En unos kuantos mezes, vaja pueder topar estas todas entrevistas en el siteo del Sefaradic Center, en el İnternet.

Antes de ampesar este proyekto, aparejimos kestiones sovre el modo de vida de los Sefaradis de sukuenta setenta anyos antes. Las kestiones fueron lo mas, sovre los kostumbres de los judios sefaradis, la gastronomia judia (partikularmente las komidas de Shabbat i de las fiestas judias), los foburgos ande moravan los judios, los kazamientos, las bar mitzvas, la vida de las mujeres, los echos de los ombres, el entretenimiento de fin de semana, las relasiones de los judios kon el enterno, i kestiones asemejantes sovre la vida judia de al tiempo. Una de las kestiones ke los enformantes respondieron kon muncho plazer, fue la kestion sovre ‘la gastronomia de los sefaradis’.

Al tiempo, el reynado de la mujer judia era la kuzina ande eya aparejava las komidas las mas savrozas por su famiya... El Gizado Sefaradi es las komidas ke los sefaradis uzavan de komer en los dias de semana, en la noche de Shabbat, i en los dias de fiestas.

El gizado sefaradi es markado kon las tradisiones djudias, i las leyes dietikas judias. Segun las reglas judias, ay una lista de alimentos ke se pueden komer, i alimentos ke no se pueden komer. Los alimentos ke no se pueden, komer son los ke son enterdidos de komer. La manera de aparejar estas komidas son tambien inkluidos en las reglas de kasher. La karne deve de ser degoyada segun lo ke dize la relijion. Ay miembros del puerpo de el animal ke es defendido de komer. No kale ke ayga mezmo una gota de sangre en la karne. Por modo de esto, la mujer judia deve de meter la karne en agua salada antes de kozerla. La karne no se puede gizar endjuntos kon leche, i si ay karne en la meza no deve de aver dinguna komida de leche en la mizma meza.

Komo Shabbat es defendido de gizar, la mujer judia kale ke apereje munchas  komidas dia de viernes. Estas komidas deven de ser aprontadas kon un tekniko espesial, ansi ke dia de Shabbat se puedan komer sin pasar muncho tiempo en la kuzina. Por egzamplio, friir en la azete, u en el orno toma muncho tiempo, ma kayntar al fuego no toma tiempo del todo.

Las mujeres sefaradis fueron enfluensadas de los gizados de los puevlos de los paizes ande emigraron, i  adaptaron munchos gizados de estos puevlos. Por egzamplio, la mujer judia turka giza boyos, borrekas, albondigas de pirasa, tishpishti, frejalda, ke son unas de las komidas judias; i en mezmo tiempo, giza  yaprakes, kebap, imam bayildi, turlu etc. ke son komidas turkas. Ma estas rechetas turkas son tambien gizadas kon sistemas judias, kon reglas relijiozas i kon gustos judios. Por egzamplio, los turkos empleyan munchos espisios (baharat) i muncho azete en las komidas ke gizan, ma las mujeres judias nunka fueron muncho enklinadas a empleyar estos espesios keazen mal al estomago. La komida judia es savroza, i sana en mezmo tiempo. Las mujeres judias gizan komidas ‘de chupar los dedos’, komo dize la dicha vieja.

Los enformantes ke yo ize entrevistas, me kontaron kon un grande eskarinyo las komidas de sus madres. El rekordo de las komidas de sus avuelos no puede ser olvidado. La nostaljia por los dias de sus chikes, los pransos de noche de Shabbat, los pransos de las fiestas judias, i de los dias de alegriya, tomo la mas grande parte de estas entrevistas. Antes, la mujer judia se ambezava a gizar de su madre, u de su esuegra, se ambezava a aperejar munchas komidas kon pokos alimentos porke no koste muy karo, i duspues transferava estas rechetas a sus ijas i a sus elmueras. Oy, tenemos livros de komidas, ande las rechetas de komidas son eksplikadas kon kantidades egzaktas. Por egzamplio, en aparejando el mallebi, vaza echar un kilo de leche, 250 gramos de arina, 250 gramos de asukar, un paketo de vanilya etc, i duspues lo vaza frapar al mikser por kinze puntos. Ma la mujer judia de al tiempo no aplikava kantitades egzaktas. Para aprontar la masa de las borrekas, vaza meter un sierto kantida de arina ‘lo ke areyeva la azete’ diziyan las mujeres de al tiempo.

Malorozamente las mujeres de oy no estan puediendo mas aplikar las reglas viejas de la gatronomia judia, porke la mujer judia mas no es la reyna de su kuzina. Oy, munchas mujeres son estudiadas, tienen profesiones, i estan lavorando afuera de kaza. Mezmo las ke no lavoran profesionalmente, estan lavorando en organisasiones judias komo amatoras, u bien estan preferando a irsen a kursos privados por developar sus talentos, u bien enformarsen sovre sujetos ke las enteresa. Las mujeres de oy estan preferando de aparejar komidas pratikas, ke no toma muncho la mano, i estan aplikando las rechetas de los livros de komidas. Eyas no tienen mas la pasensia, i el tiempo de muestros avuelos.

Malorozamente, ‘El Gizado Sefaradi’, komo munchos de los kostumbres de los sefaradis, kedo en las memorias, en las kantikas, en las dichas, en el refran sefarad,i ke los ayedados se estan dianda akodrando, i lo estan nombrando kon una grande nostaljiya. En unos kuantos anyos, me espanto ke no va kedar dingunos ke va nombrar las komidas de ‘chupar los dedos’.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın