Las ultimas relasiones entre Obama i el mundo Judio

Las ultimas relasiones entre Obama i el mundo Judio

Duspues de los ultimos desakuerdos (anlasmazlik) entre Yerushalaim i Washington, el Prezidente Barak Obama deklaro a la presa, ke la relasion espesial enre los Estados Unidos i İsrael no troko. Obama disho ke estos dos paizes son unidos kon valores i enteresos komunes, las fuersas ke amenazan (tehdit etmek) İsrael tambien amenazan los Estados Unidos, i ke estas fuersan keren deteriorar (bozmak) los esfuersos de pas en el Oriente Media. Segun Obama, la aliansa kon İsrael sierve a la seguridad de los Estados Unidos.

Obama tambien avlo sovre las negasiones de pas, diziendo ke eyos no vana empozar la pas del eksterior, i ke los lideres de las dos partes deven de negosiar direktamente para pueder tomar las mas difisiles desiziones.

Entremientes, el Primer Ministro Benjamin Netanyahu no aksepto las demandas de la administrasion de Obama, de aretar la konstruksion en la parte oriental de Yerushalaim. A la demanda de la administrasion de Obama, Netanyahu respondio ke el esta dakordo a akseptar la liberasion de algunos palestinianos aprezados, i de fasilitar los muvimientos de los palestinianos, ma la kestion Yerushalaim nunka va trokar.

De la otra parte, komo lo savemos, el mez ke pasimos, Elie Wiesel kritiko la presion amerikana sovre İsrael, i disho ke el estado de Yerushalaim nunka va ser una solusion de pas.

La otra semana, Elie Wiesel tuvo una reunion de dos oras kon Obama en el White House. Duspues de la reunion, Wiesel disho ke avlaron sovre la kestion Yerushalaim. Obama lo oyo a Wiesel, i respekto su konsejo de asperar fin a la fin del proseso de pas para solvar la kestion de Yerushalaim, i aksepto ke la kestion de Yerushalaim no va ser el primer sujeto de las negasiasiones de pas.

Obama tambien le disho a Wiesel, ke el tuvo una konversasion muy pozitiva kon el Primer Ministro Netanyahu, i ke se desidaron de kontuniar el proseso de pas.

Avlando sovre el sujeto del program nuklear de İran, Wiesel disho ke este sujeto ke enteresa los dos paizes, i tambien las otras nasiones de la rejion, fue una parte muy emportante en la konversasion entre el i Obama.

Una otra novela sovre los Estados Unidos, es la nominasion de una mujer judia al Korte Supremo. Obama se desido de eskojir Elena Kagan entre munchos kandidatos, i la nomino komo judeza al Korte Supremo, al lugar de John Paul Stevens ke se retiro. Elena Kagan va ser la tresera judeza feminina ke fue nominada al Korte Supremo fin oy. Diya de lunes, Obama anonso su eleksion al White House.

La nominasion de majistrados al Tribunal Supremo, es una de las mas emportantes desiziones de los Prezidentes de los Estados Unidos. El Tribunal Supremo tiene un grande pueder sovre la vida kotidiana, tambien tiene el pueder de votar sovre problemas de vida i de muerte, i sovre las libertades individuales i las libertades del governo. Los juezes no deshan sus postos fin ke se retiran.

Un elemento santral en la eleksion de Obama por Elena Kagan, es la reputasion de Kagan de reunir personas de opiniones diferentes, i de ganar sus respekto.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın