Tu Bishvat se selebro en la Sinagoga Hemdat İsrael de Kadıkoy

Tu Bishvat se selebro en la Sinagoga Hemdat İsrael de Kadıkoy

Komo kada anyo, diya de Alhad, la fiesta Tu Bishvat se selebro en la Sinagoga Hemdat İsrael de Kadikoy, kon la partisipasion del Grande Rabino, İsak Haleva, i el Konsul de İsrael., Moshe Kamhi.

El Vice Prezidente.de la komunidad, Sami Herman, los dirijentes de la komunidad, los prezidentes de las enstitusiones i de las asosiasiones, los miembros de muestra komunidad asistieron a esta selebrasion.

Los mansevos del Talmud Tora de Caddebostan aresivieron los asistentes kon la kantika Baruh Aba (Bienvenida), i kon una demonstrasion de la fiesta.

El primer enterlokutor, el Prezidente de la Komunidad de Kadikoy, Mordo Kumrulukus, en su deskorso, mos avlo de la sinyifikasion de la fiesta Tu Bishvat, i mos konsejo de enkontrarmos en la Sinagoga mas frekuente, komo lo izimos oy, para pueder dar a muestras kreaturas una edukasion buena, i ensi, pueder sumeter muestra komunidad en manos mansevas i rezyas.

Los elevos de Talmud Tora mos kantaron las kantikas de la fiesta, i meldaron del Tefillim, los pasajes ke sinyifikan la emportansa de esta fiesta.

El Prezidente de Talmud Tora de Caddebostan, İzak Babat,  mos ekspliko la valor de las frutas de los arvoles, i mos disho ke esta ermoza ambians de oy, es el reflekto de estas frutas. ‘Grasias a los lavoros de los mansevos de Talmud Tora, oy estamos puediendo respirar esta ermozo ambians en muestra Sinagoga’ disho Babat, i ajuto: ‘Vamos a kontinuar a transferar los arvoles del judaizmo fin al enfinito’.

Duspues del konserto de los imnos del Koro de Maftirim, la selebrasion kontinuo kon una ovra de teatro prezantada por los mansevos de Talmud Tora. Los mansevos mos transferaron el mesaje de Tu Bishvat, en reanimando una famiya kon todos sus miembros, asentados alrededor de la meza en sus kaza, i kada uno diziyendo la Beraha de kada fruta, antes de komerla.

Un elevo viejo de Talmud Tora, Hayim Hason, envito al Grande Rabino, i al Rav Leon Adoni a la Teva, por prezantar una gratifikasion al elevo Rael Mermer, ke reprezento muestra komunidad, en la kompetision de Tanah de todos las komunidades judias del mundo entero.

En su deskorso, Rav Leon Adoni, mos avlo de la sinyifikasion de la fiesta, i mos disho ke el mez de Shevat es el mez de simha, de alegriya, porke sinyifika el nasimiento de la natura. ‘Segun la Tora, ensembrar un arvole es una miztva’ disho Adoni, i ajuto:‘El Dio kreo la guerta Eden, i mozotros komo El, kale ke kreamos guertas, i engrandesamos muestras kreaturas ke son muestras frutas, atadas a muestras tradisiones, komo son atadas las frutas rezias a los arvoles’.

El Koro de los viejos elevos del ekol Nesim Behar, dirijado por İzzet Bana, mos prezento un konserto formidavle, konstituado de las mas ermozas kantikas ke konosemos todos.

El Vice Prezidente de muestra komunidad, Sami Herman, mos disho ke el fue muy empresionado kada anyo de la familiaridad, de la senseridad de los yahites de esta Sinagoga, de las ermozas selebrasiones de Tu Bishvat, i de la seremonia de la plantasion de un arvole en la guerta de la Sinagoga. Sami Herman mos avlo tambien de la signifikasion de Tu Bishvat. ‘Komo los arvoles ke no tienen raizes rezyos no pueden bivir munchos anyos, las personas ke refuzan sus tradisiones i la estorya de sus puevlos, no pueden tener dingun futuro, i son kondanados a dispareser’ disho Herman.

En su deskorso, el Grande Rabino İsak Haleva, mos disho ke el koro de los elevos de Nesim Behar es un mesaje para los mansevos, i les va dar una enspirasion mueva. ‘Los mansevos deven de akseptar la Tora komo orientador en sus kaminos, para pueder tener un futuro luninozo’ disho Haleva. ‘La fiesta de Tu Bishvat, en dando el mesaje de ‘Proteja la Natura’ i en dandomos la nuvela del nasimiento de la natura, mos esta tambien reunando a todos los judios del mundo, mezmo los ke estan biviendo en los mas yelados lugares, kon la priyera de la natura’ ajuto el Grande Rabino, i konsejo los mansevos de tomar fuersas de muestras tradisiones, ke sinyifikan muestras raizes, para pueder bivir todos endjuntos en armonia.

A la fin de las selebrasiones, se avio el Ehal Akodesh, i todos los asistentes disheron endjuntos la priyera Anoten kon grande emosion. En saliendo de la Sinagoga, todos se dirijaron a la guerta para ensembrar un arvole, komo se aze kada anyo en Tu Bishvat.

Rogaremos al Dio ke mos de repozo, para pueder selebrar todas las fiestas endjuntos komo oy, kon grande alegriya.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın