La estoria de reushita de los Judios

La estoria de reushita de los Judios

Segun un artikolo ke meldi en la presa, los judios azen el 0,2 por sien de la populasion mondial, ma par kontra, el 54 por sien de los shampiones de ajedrez (satranç); el 27 por sien de los ganadores del premio Nobel de Fizika; el 37 por sien de los ganadores de diversos premios de medisina.

Los judios azen el 2 por sien de la populasion de los Estados Unidos, ma de mezmo, el 26 por sien de la lista de onor del Kennedy Center; el 37 por sien de los direktores ganadores de premios akademikos; el 38 por sien de la lista de los prensipales filantropistos, i el 51 por sien de los ganadores del Premio Pulitzer.

 En su livro ‘The Golden Age of Jewish Achievement’, Steven L. Pease esta diziendo ke, la kreansia de los judios en el progreso i en la responsabilidad personal, es una de las razones de sus adelantamientos.

 En la Edad Media, la majorita de los judios fueron ovligados a abandonar la agrikultura. Por esta razon, sus desandantes fueron ovligados a bivir en empleyando sus meyoyos. Munchas vezes, emigraron de un pais al otro, kon la ambision de un emigrante. Estos judios benefitaron de la kreatividad de los paizes ande bivieron.

 Es verdad ke no se puede topar una sola eksplikasion por la reushita de los judios. Puedemos sitar munchas razones por esto. Si analizamos la estoria, vemos ke por munchos anyos, los judios de la Diaspora fueron mas adelantados de los judios de İsrael. Los israelianos no tuvieron tiempo, eyos fueron ovligados a dedikar sus enerjias a las gerras i a la politika.

 Ma, en los anyos dalkavo,  esto troko kon las reformas ekonomikas en İsrael. La emigrasion de un milion de rusos, i el empesijo del ‘proseso de pas’ (peace process), kavzaron un trokamiento istoriko en İsrael.  Ansi, los israelianos empesaron a entrar a la teknolojia, i al komerso. Esto izo un efekto muy grande en el adelantamiento, i en la ekonomia del paiz.

 Tel Aviv se konvertio en uno de los mas emportantes sentros enterpretores del mundo entero. İsrael tiene la mas alta mueva teknolojia del mundo entero. En mezmo tiempo, İsrael es el lider mondial en la investigasion, i en el developamiento sientifiko.  El butche apartado por estas investigasiones es muy grande. İsrael okupa el sigundo lugar en el mundo entero, en la lista de kompanias en el Nastaq.

 Komo Shaul Singer eskrivio en su livro ‘Start up Nation’, la estoria de İsrael es la estoria de un miraklo ekonomiko. Los israelianos ke son ‘obsesivos de la mueva teknolojia’ estan lavorando en kolaborasion, i se mantienen de las ideas de unos a los otros.

Segun los obzervatores, İsrael se va konvertir al Hong Kong del Medio Oriente, i va prokurar benefitos ekonomikos al mundo arabo. Ma el salte ekonomiko de İsrael, va ogmantar la distansia kon sus vizinos. Todos los paizes de la rejion estan avlando sovre ‘ankurajar las novedades en sus paizes’. Estos paizes rikos de petrol, estan gastando miliones de dolares para establisar sentros de teknolojia. Ma los paizes arabos no tienen la tradision de interkambio (degis tokus) entelektual i el interkambio de kreatividad teknika, komo İsrael lo aze kon otros paizes. Por egzamplio, entre los anyos 1980 i 2000, los ejipsianos rejistraron 77 patentes en los Estados Unidos, los suudi arabos rejistraron 171 patentes, los israelianos rejistraron 7.652 patentes.

 Del espanto, si un diya İran echa una bomba nuklear a İsrael, los israelianos estan en kontakto kon los judios amerikanos, por pueder savlar la ekonomia del paiz.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın