Suetos i dezeyos por el anyo muevo

Suetos i dezeyos por el anyo muevo

Roshashana es el tiempo kuando mos metemos enfrente del Dio, i le rogamos ke muestros dezeyos se realizen en el anyo vinyendo. Ma, antes de todo, en primero, lo regrasiamos por todo lo ke mos dio, i le rogamos de darmos sanedad, i fuersa para pueder gerreyar kon las difikultades ke rankontramos kada diya.

El otro diya, meldi un artikolo sovre ‘la realizasyon de muestros dezeyos’ en un periodiko. Vos kero eskrivir un poko sovre este artikolo.

Los obstaklos ke mos empedian (engellemek) de realizar muestros dezeyos, son muestras negras manyas, muestras kreensas yerradas, muestros dezeyos irrealistos, i los defektos de muestro karakter.

Antes de todo, esta dizyendo el artikolo, kale ke akseptamos ke el Dio mos kreo a kada uno, kon diferentes kapachedades, i ke dinguno de mozotros no es perfekto. Ma, mezmo ke no somos perfektos, el Dio mos dio estas kapacedades por ke las empleyemos. El Dio mos embiya tambien munchas oportunidades para ke las puedamos  empleyar.

La persona ke se eskonde de sus defektos, o ke inyega sus defektos, no puede tener objektos realistos. Si konosemos muestras kapachedades, i akseptamos muestros defektos, akeya vez puedemos alkansar a lo ke keremos.

Konoserse a si, i kererse bien a si, toma tiempo. En lugar de demandarme de mi para mi, ‘Komo puedo pareser a esta persona ke es tan reushida?’, kale ke me demande, ‘Komo puedo empleyar mis kapachedades, i las fuesas ke el Dio me dio, para pueder realizar mis objektos’. Naturalmente, el dezeyo ke tengo, kale ke akorde kon mi karakter. En siendo ‘YO’,  en siendo pasensioza, i en empleyando mis fuersas, puedo reushir a alkansar mis objektos.

Reushir a alkansar muestro objekto de la primera vez, munchas vezes, no es posivle. Munchas vezes mos yerramos, no puedemos reushir. Mezmo Moshe Rabeno, no puido reushir a kitar a los judios de Ejipto, mezmo ke el Dio le aviya prometido de ayudarle.

Munchas vezes, el Dio mos prova, en permetandomos ke agamos yerros, porke El kere saver ke karar mos estomos kreendo en muestro objekto.

El Dio mos djuzga segun los eforsos ke azemos, i no segun muestra reushita. En el judaizmo, ‘Reushir es pueder konoserse a si’. Kale ke digamos, ‘Esto azyendo todo mi pueder kon mis senseros eforsos, para pueder reushir’.

Vos sueto a todos una anyada buena kon sanedad i alegriya, i vos sueto de pueder realizar  vos dezeyos en el anyo muevo.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın