Selihot en el Kal de Burgaz

Selihot en el Kal de Burgaz

Este anyo; en la sinagoga de Burgaz ke es dependyente (bağlı) de la fondasyon Neve-Shalom; alhad demanyana a las kuatro i medya, se izo un “SELİHOT” espesyal i muy ermozo.

Espesyal; porke aviya kaji sesenta partisipantes (katılımcı), ke los dyes eran mansevos de 13 a 15 anyos, i dyes ijikas de la mizma edad ke asistyeron a esta orasyon.

A parte de eyos; lo mas emportante es ke el presidente de la fondasyon Neve-Shalom; Jojo Nasi kon su mujer i su madre asistyeron a esta seremoniya kon  Eliezer Arditi i su mujer, i Sabi Beraha alkilaron una barka (tekne) de Büyükada a las tres i medya de la medya noche, para pueder vinir al Selihot.

El Hazan Arashi David Sevi; kon su boz dulse i maraviyoza  manyetizo a los partisipantes. İ el savyo sinyor Palachi lo akompanyo en meldando diferentes partidas endjuntos. Estava komo un koro, las orasyones i kon el hazan Şimon Asayas.

Leon Esim kon Yosi Haleva tanyeron (çalmak) tanto ermozo el Shofar; ke todas las mujeres se emosyonaron i ampesaron a yorar.

Estava koza de ver!..

Una shena (sahne) muy sentimental.

A la fin, todos emosyonados i satisfezados, partisiparon a la seuda ke paso muy alegre kon el Grande Rabino İzak Haleva; ke remersyo a los mansevos de asistir a este dia emportante, i ke eyos son el avenir muestro ke van a kontinuar muestras tradisyones, muestros uzos.

A la nochada; uvo un filmo en la kolonia de vakansas; “The Traidor”; (Küçük Hain).

El sujeto era ke; en 1947 el tyempo ke dainda İsrael no se aviya fondado; i estava debasho la influensa de los İnglezes; la amistad i el amigable ke aviya akel tyempo.

Los İnglezes estavan dominando la Palestina. La brigada inglez era konosida; kon sus chapeyos kolorados, ke eyos aseguravan (temin etmek) el orden publiko (asayiş).

El sujeto del filmo era; la amor entre un ijiko de 12-13 anyos israelyano, kon un soldado ingles.

El amigable i la amor entre eyos, i la manera de bivir akel tyempo kon pas i amor.

Akel tyempo en Yerushalayim era defendido de salir a la kaye la noche despues de las sinko. Este ijiko un dia se topo en la kaye, koryendo a su kaza,  el soldado ingles lo aferro para yevarlo a la prison.

En el kamino avlando, las repuestas entelijentes del chiko lo maraviyo (şaşırttı), i le plazyo, i le tuvo una sempatia, i lo desho libero (serbest).

Los djudyos, los musulmanos, los kristyanos, los arabos i los inglezes biviyan endjuntos. Todos respektuozos (saygılı) los unos kon los otros, avlando, burlando i diskutyendo, en dando emportansa a las ideas del den frente.

Veramente ke akel tyempo el mundo estava mas sivilizado (medeni). No aviya salvajeria (vahşet).

Mizmo la saveduria (bilgi) de un ijiko chiko teniya una emportansa, valor.

La pas (barış) era una nosyon emportante para kontinuar a bivir.

La amistad (dostluk)  entre el soldado i el chiko; mizmo ke los dos eran de relijyones diferentes, i kada uno keriya bien a su pais mas muncho de su egzistensya; era  koza de ver...

El manseviko kuando se iva al shuk (pazar), los vendedores arabos lo karesavan i le davan lo mijor, en azyendo shakayikas entre eyos.

Malgrado la atmosfera ke egzistiya entre eyos aviya una umanidad (insanlık).

Esperaremos ke la umanidad syempre va triunfar (galip gelmek)!...

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın